Стапката на паѓање кај бремените жени е иста како кај жените во поодминати години, открива научна студија
Телото на жената доживува огромна трансформација за време на деветте месеци од нејзината бременост. Некои од овие промени можат значително да го зголемат ризикот од паѓање и експертите велат дека многу од идните мајки не се свесни за овој факт. Студија од 2010 година, интервјуираше скоро 4 илјади жени и откри дека 1/4 паднале за време на бременоста и една од 10, паднале два или повеќе пати. Ова ги става бремените жени под ист ризик од паѓање како 70-годишните жени. „Ова се сосема зачудувачки броеви. Овој јавен здравствен проблем може целосно да се спречи“ – истакнува Кари Данинг – Kari Dunning доцент по рехабилитациски науки при Универзитетот во Синсинати.
Според експертите, просечна бремена жена се поправа за 10 до 16 килограми до третото тромесечје и мора да компензира за промена на нејзиниот центар за гравитација. Во исто време, телото произведува повеќе од хормонот релаксин којшто ги отпушта лигаментите што ги држат зглобовите заедно.
„Тоа е прилагодување за да се овозможи раѓањето и за да му се овозможи на бебето коешто е поголемо од вообичаениот премин низ карлицата, да биде родено. Но, таа релаксација предизвикува многу нестабилност во нивните зглобови. Како последица, жената може да почувствува како зглобовите во колената или лактите излегуваат надвор од местото или пак, нејзините глуждови може да станат малку нестабилни‘“ – рече д-р Лео Периера – Leo Pereira специјалист за високоризична бременост од Универзитетот за Здравје и Наука во Орегон.
Падот може да предизвика предвремени контракции.
Повеќето од испитаните трудници потврдиле дека најголем дел од падовите биле предизвикани поради лизгав под, лош избор на обувки или пак, поради непочитување на безбедносните мерки, како на пример држење за оградите на скалите. Во 29% од падовите, жената носела нешто потешко за време на несреќата. „Тоа се случува во текот на секојдневните работи. Тоа не е поради тоа што луѓето прават луди работи“ – додава д-р Периера.
Истражувачите од Универзитетот Хирошима во Јапонија, неодамна употребија тродимензионална опрема за снимање, слична на онаа користена за правење на анимирани филмови, за да го проучат начинот на кој трудниците се движат. Тие открија дека дури и за време на првото тромесечје, центарот за гравитација кај трудниците е многу понапред, поради што тие се наведнуваат наназад кога стојат и помалку ги свиткуваат колковите кога одат. Комбинацијата доведува тие да се сопнуваат на своите прсти од нозете или полесно да ја губат рамнотежата.
Жените во блажена состојба треба да избегнуваат да носат тешки работи и треба цврсто да се држат за оградите кога одат по скали.
Ризикот од паѓање се зголемува како што напредува бременоста, а најмногу паѓања се случуваат во третото тромесечје. Помладите жени се изложени на поголем ризик од повреда, затоа што и нивото на нивната активност е поголемо отколку кај трудниците над 35 години. Според Периера најголемата загриженост е откинувањето на плацентата, што може да доведе до предвремено пораѓање или во ретки случаи раѓање на мртво дете. „Кога имате забрзување во една насока и одеднаш прекинување, плацентата може да се откачи од ендометријалната облога. Секогаш генерално ги надгледуваме за време од 24 часа по паѓањето за да видиме дали тоа се случува или не“ – додава тој.
Во најголемиот дел од случаите, трудниците кои паднале се здобиле само со мали повреди или модринки.
Една анализа од страна на научниците од „Харборвју“, центарот за истражувања и превенција од повреди од Универзитетот во Вашингтон, откри 49 хоспитализации поврзани со паѓање на 100.000 бремености. Скоро половина од жените задржани во болница имале фрактури, додека многу други се здобиле со контузии или шинати или изместени зглобови.
„Бремените жени имаат потреба од огромно количество на калциум дневно, што многумина од нив не го добиваат, па тие се нешто повеќе склони кон кршење на коските. Тоа е дефинитивно слична ситуација како со постарите жени“ – вели д-р Барбара Њуман – Barbara Newman, директор на Сент Чарлс Центарот за женско здравје во Бенд. Експертите сметаат дека паѓањата за време на 9-те месеци можат да се спречат.
Лекарите препорачуваат бремените жени да ги преземат сите можни безбедносни мерки за да ги избегнат паѓањата и за да се заштитат себе и своето бебе. Тоа вклучува избегнување на високи потпетици и секогаш да им биде слободна барем едната рака, за да имаат како да се задржат во случај да почнат да паѓаат.
