Кога станува збор за работните услови, понекогаш немаме друг избор освен да ги прифатиме и да научиме како да се погрижиме за зачувување на нашето здравје
Нашето здравје треба да ни биде приоритет без разлика на работата која ја работиме и работните услови кои треба да ги прифатиме. Сите знаеме дека работењето на биро и поминувањето на работното време во седечка положба може да има свои последици по здравјето. Но, според некои истражувања и долгото работење на нозе, во стоечка положба, може да влијае врз здравјето исто така.
Во светот постојат многу работници кои поминуваат повеќе од три четвртини од работното време стоејќи. Доколку стоите на нозе по најмалку пет часа дневно може да се соочите со штетни последици по вашето здравје. Замор во мускулите на долните екстремитети, грчеви во нозете и болка во грбот се само некои од краткорочните здравствени проблеми со кои би можеле да се соочите. Но, истражувањата имале за цел исто така да проверат дали стоењето на нозе подолго време во текот на денот може да придонесе за појава и на некои долгорочни здравствени проблеми.
Половина од испитаниците во истражувањето биле на возраст помеѓу 18 и 30 години, а другата половина помеѓу 50 и 65 години, и се состоеле од 14 мажи и 12 жени. Никој од нив немал историја на невролошки или мускулно скелетни нарушувања. За потребите на истражувањето било потребно да извршуваат одредени задачи од областа на производството додека стоеле на нозе во времетраење од пет часа со неколку петминутни паузи и една пауза од половина час за ручек. На учесниците им било кажано да пријават секаква форма на непријатност што би можеле да ја почувствуваат. Резултатот бил јасен: без разлика на возраста или полот, кај сите учесници биле регистрирани прилично голем замор и исцрпност на крајот на работното време. Но, сепак било забележано дека се потребни повеќе истражувања за да се најдат дополнителни решенија за справување со можните здравствени проблеми кои може да се појават како резултат на долгото стоење на нозе.
Вежби за истегнување, почести паузи или подинамични активности на работното место може да ги олеснат последиците од работењето на нозе како заморот и болката во мускулите. Целта е да се стремиме кон подобра циркулација на крвта во телото. Според научниците, најдобро решение за овој проблем би биле почести паузирања кога работниците би можеле да се раздвижат наоколу (можеби да завршат некоја друга работа како копирање или слично) или да се одморат. Тие велат дека продуктивноста на работниците не би се намалила како резултат на почестите паузирања.
Ние самите сме одговорни за нашето здравје. Погрижете се за себе сѝ.
