Одлучивте да започнете со трчање и сте во потрага по најсоодветните обувки? Прочитајте ги петте неопходни совети што треба да ги земете во предвид
Патиките што ги пробувате во продавница, можеби ви изгледаат удобно, но дали се вистинскиот избор за вас, ќе дознаете единствено после истрчаниот километар. За да изберете обувка по мерка, не е важна само удобноста, туку треба да се земат во предвид уште многу други фактори: вашата телесна тежина, на каква површина планирате да спортувате, вашата здравствена состојба, степенот на кондиција и слично. Најпрво, прочитајте ги најважните пет совети:
Одредете го вашиот стил на газење
Стил на газење подразбира начин на кој стапалото „слетува“ на подлогата. При долготрајни тренинзи и напрегања, може да дојде до повреда на стапалото, па затоа е важно да одредите каква пронација имате. Еден начин за утврдување на пронација, е да го снимате вашето трчање додека сте на лента за трчање, додека најлесен начин за одредување на обликот на стапалото, е да ги наводените стапалата и да застанете на картонска подлога.
Стапалото може да има:
- Нормален облик – значи дека има неутрална или нормална пронација;
- Спуштено стапало (рамни табани), или надпронација – при газење, стапалото првиот контакт го остварува од внатрешната страна, односно најпрво правецот пета – палец ја допира површината, а потоа останатиот дел на стапалото;
- Стапало со супинација – при газење, стапалото првиот контакт го остварува од надворешната страна, поточно односно правецот пета – мал ножен прст најпрво ја допира површината, а потоа останатиот дел на стапалото. Ваквото стапало најчесто се карактеризира со висок ножен зглоб кој на тестот со влажен отисок, ќе покаже прекин помеѓу петата и прстите.
Откако ќе одредите какво е вашето стапало, ќе знаете каков модел на патики ви требаат: доколку имате нормална пронација побарајте normal патики, доколку имате умерена пронација, побарајте stability патики. Изразена пронација подразбира максимална стабилност, што значи дека треба да побарате motion control патики, како и користење на анатомски влошки. Доколку имате супинација, треба да користете патики со изразена амортизација. За супинација, како и за нормална пронација, погоден е моделот cushioning, односно многу меки патики.
Одете во шопинг на патики доцна попладне
Крајот на работниот ден се смета за најпогоден при изборот на патики, бидејќи во овој период од денот, ногата ви е веќе малку отечена од секојдневните обврски и на овој начин најточно ќе видите кои патики најмногу ви одговараат. Не купувајте патики или било какви обувки преку интернет, односно без да ги пробате. Исто така, важно е да не брзате при купувањето.
Не се водете според одреден бренд
Никогаш не се водете според одреден популарен бренд кој ви стои убаво и е модерен. Исто така, не ги купувајте истите патики кои што ги има вашиот пријател и ве уверува дека се одлични, бидејќи стапалата на секој човек се различни.
Големина на стапалото
Не се водете според дефинираната големина на стапалото, бидејќи брендовите имаат различни мерки и големини, така што, доколку носите одреден број од еден бренд, не значи дека истиот број ви одговара и при пробување на друг бренд. Исто така, веднаш штом ќе ја пробате патиката, таа треба да ви биде удобна и никако стегната, односно тесна. Сите видови на патики (со исклучок на оние кои што го имитираат босоногото трчање) треба да обезбедуваат малку простор во предниот дел на стапалото, кај прстите.
Одредете го видот на површината на која што трчате
Доколку планирате да трчате на тврда подлога како асфалт или бетон, се препорачуваат патики со повисока и поеластична пета со вградени воздушни перничиња, со цел да се намали притисокот на лигаментите и колената и да се избегне болка. Сепак, познавачите и стручните лица советуваат патики кои што немаат многу голема амортизација, бидејќи големата поддршка предизвикува атрофија на малите мускули кои се наоѓаат на стапалата.
