Дали патите од мигрена? Информирајте се за раните знаци на мигрена
Мигрената претставува невролошко заболување со генетска условеност. Тоа значи дека доколку еден ваш родител пати од мигрена, 50 проценти имате шанси да заболите и вие. Мигрената треба да се разликува од главоболка и од синусна болка. Во најголем број на случаи кои што мислат дека имаат синусна болка, всушност патат од мигрена, бидејќи синусната болка се јавува доколку има инфекција.
Жените се повеќе подложни на мигрена а таа може да се добие на секоја возраст.
Мигренозната болка може да трае до 72 часа, се одликува со пулсирање и различен интензитет, а често ги отежнува или целосно оневозможува извршување на секојдневните обврски. Интензивна и силна болка, чувствителност на светло и звук, мачнини и повраќање, се најчестите знаци на мигрена. Раните симптоми кои што укажуваат на мигрена, може да се појават и 24 часа пред силната болка, така што корисно е да се знаат со цел ненадејната силна мигренозна болка да не биде изненадување. Мигрените најчесто се составени од четири фази, иако можеби на индивидуално ниво, нема да се доживеат сите фази.
Прва фаза
Симптомите типични за првата фаза, која најчесто започнува 24 часа пред мигренозната болка, ги чувствуваат 60 проценти од оние кои патат од оваа состојба. Симптомите се:
- Опстипација или дијареа;
- Зголемена потреба за храна;
- Проблеми со концентрацијата;
- Вкочанетост на мускулите, особено на мускулите на вратот;
- Зголемено уринирање;
- Замор;
- Депресија или еуфорија.
Втора фаза
Оваа фаза, наречена аура, ги зафаќа сензорните дразби. Оваа фаза може да трае од 5 минути до еден час. Овој стадиум не им е доволно истражен на експертите, но сепак можат да се одделат неколку симптоми карактеристични за оваа фаза:
- Светли точки кои го попречуваат видот;
- Намалена способност за гледање;
- Отежнат говор;
- Конфузија.
Трета фаза
Оваа фаза се одликува со зголемена болка која може да трае до последната фаза. Се одликува со сензитивност на светлина, звуци, дури и на мириси.
Четврта фаза
Оваа фаза следи после мигрената и дава чувство на ментален мамурлак. Кога болката ќе намали, повеќето чувствуваат истоштеност, немаат енергија или се конфузни. Исто така, оваа фаза се одликува и со зголемен умор, проблеми со концентрацијата и вртоглавици.
Повеќето од луѓето се навикнати да живеат со мигрена и не бараат лекарска помош. Доколку често патите од оваа состојба, знајте дека таа може да се намали доколку побарате стручен совет.
