Употребата на анаболичките стероиди постојано расте и покрај тоа што се знаат негативните последици од нивното користење
Сведоци сме на чести примери на дисквалификувани спортисти кои што користеле забранети супстанци за подобрување на перформансите. Законите за допинг постојано се менуваат и надополнуваат, бидејќи на пазарот секојдневно се појавуваат нови „засилувачи“ на перформанси. Последен пример за паѓање на допинг тестот е позната тенисерка Марија Шарапова. Бидејќи правилата и дефинициите брзо се менуваат, голем дел од луѓето се збунети и неинформирани за користењето на суплементи. Најпрво, клучно е да се прави разлика помеѓу суплементи и стероиди.
Тестостеронот и хормонот за раст, природно се наоѓаат во телото, но кога се во синтетичка форма, тестостеронот и хормонот за раст го активираат алармот за тест на дрога. Тие се забранети во спортот заради надмоќта со која се стекнува корисникот (спортистот кој ги употребува) кон останатите натпреварувачи, што би резултирало со неправедна предност, што е спротивно на целиот концепт на спортското однесување.
Бодибилдерите се групата на спортисти, кои што најчесто посегнуваат по нелегални супстанци како што се анаболичните стероиди. Тие се соединенија коишто се поврзуваат со хормонот тестостерон, којшто брзо може да ја зголеми телесната маса и силата, но во исто време носат и многу негативни последици, како висок крвен притисок и спротивни полови карактеристики.
Негативни последици од употреба на анаболични стероиди
Човековото тело, на природен начин произведува доволна количина на хормони, и секоја зголемена доза предизвикува пореметување на организмот. Употребата на хормони за подобрување на перформансите носи многу проблеми како: заболување на срцето кое може да доведе со срцев удар, заболување на црниот дроб, сексуална дисфункција и атрофија на тестиси. Останатите негативни ефекти вклучуваат: губење на косата, болки во јазикот, прекумерно потење и проблеми со кожата, хиперактивност, халуцинации, раздразливост, тумори на црниот дроб, цироза, како и зголемен ризик од повреда на мускулите, тетивите, лигаментите и ограничен раст кај адолесцентите.
Проценето е дека околу 38% од билдерите користат стероиди.
Едно научно истражување го има испитано влијанието на стероидите врз меморијата. Резултатите покажале дека оние кои користеле стероиди имале нарушена меморија, како и проблеми со вниманието, памтењето, планирањето и извршувањето на секојдневните задачи. Со други зборови, долготрајната употреба на стероиди, може негативно влијае врз сите сфери од животот.
Друго истражување пак, го поврзува користењето на анаболичните стероиди со намалено ментално здравје подоцна во животот. Истражувачите пронајдоа врска помеѓу корисниците на стероиди со депресија, проблеми со концентрација и агресивно однесување.
Зошто трендот на нивна употреба расте, наместо да се намалува?
Најпрво, младите генерации се огледуваат на познатите спортисти и сакаат да изгледаат исто како нив. Освен тоа, притисокот да се изгледа мускулесто е сè поголем, заради брзорастечкиот тренд дека мускулите се знак на здравје и убавина. Проблемот се појавува кога се посакуваат брзи резултати.
