Читајте за да бидете поздрави и посреќни
Читањето е корисно за лична надградба, ментална стимулација, помага за подобро вербално изразување и претставува душевна храна. Секако дека читањето каталози или натписи, како и бескрајното трагање на интернет, не се класифицира како читање, туку се мисли на читање со книга во рака. Во продолжение ќе наведеме само неколку од бројните здравствени придобивки од читањето.
1. За поздрав мозок
Менталната активност е многу важна за намалување на прогресот на болести како деменција и Алцхајмер, тврдат одредени истражувања. За мозокот важи правилото – колку повеќе го користиш, толку подобро работи. Како и секој дел од телото, на мозокот му е потребна активност да за остане здрав.
2. Го намалува стресот
Според истражувањето на Канадската национална кампања за читање, читање во времетраење од само 6 минути го намалува стресот за дури 60 проценти. Читањето е поделотворно во намалување на стресот од активностите како: слушање музика, пиење чај, прошетка и играње видео игра. Исто така, читањето помага за подобро заспивање и поквалитетен сон.
3. Ја зголемува интелигенцијата
Детските книги дури за 50 проценти содржат поголем фонд на зборови од телевизијата или разговарањето, истакнуваат некои истражувања. Изложувањето на нови зборови придонесува за подобри резултати на општите тестови на интелигенција кај децата. Освен тоа, доколку детето добро чита од мала возраст може да води до повисоко ниво на интелигенција понатаму во животот.
4. Ве прави емпатични
Сочувството му дава квалитет на животот, емпатијата нè прави луѓе. Редовното читање помага да се најдете во „туѓа кожа“ и да сочувствувате со другиот. Книгата, особено читањето фикција, ја има таа моќ да ви помогне да ги разберете туѓите емоции. Разбирањето на луѓето околу вас е клучна вештина за воспоставување на сложените социјални односи во едно општество. Според истражувањето на Канадската национална кампања за читање, оние кои што редовно читаат книги донираат средства и волонтираат повеќе од оние кои што не читаат.
5. Ја подобрува концентрацијата
Да се задржи фокусот во денешно време знае да биде голем предизвик. Неможноста за концентрација најмногу се остварува преку постојаното ѕвонење на телефонот, добивање на секакви известувања, пристигнување на интернет пошта, па еден современ човек треба работи повеќе работи во истовреме. Современото темпо на функционирање нè направи сите малку да патиме од АДХД, условно кажано. Токму читањето помага да се задржи фокусот и да се подобри концентрацијата. Најдете време да читате пред работа (додека патувате на работното место) околу 15 минути и ќе забележите дека сте пофокусирани на работа.
