Боенките за возрасни се во првите десет најпродавани книги на „Амазон“
Боењето, познато како една од омилените активности на децата, повеќе не завршува по детството. Последниве неколку години, сè попопуларни стануваат боенките за возрасни и во моментов, тие се во првите десет најпродавани книги на „Амазон“. Истражувачите и терапевтите го истакнуваат смирувачкиот ефект што го има боењето и токму на тоа се должи нивната популарност која од хоби премина во тренд и алтернатива за медитација. И кога ќе се размисли за ова, всушност е логично. Секој кој ужива во медитативното чувство што го нудат активности со мал ментален напор како плетење или косење тревник, веднаш ќе го разбере овој концепт на опуштање. Грижата за себе е многу важна и неопходна, без оглед дали се работи за трчање, создавање уметност или читање, бидејќи за да се зачува менталното здравје покрај многуте обврски, брзиот начин на живот, работата и животни случки, одвреме-навреме секој треба да „наполни батерии“.Според Американската асоцијација за терапија со уметност, ваквиот вид на терапија преку уметност, се користи за „истражување на чувства, препознавање на емотивни конфликти, себеспознавање, контролирање на однесувањето и зависностите, развивање на социјални вештини, подобрување на чувството за реалноста, намалување на вознемиреноста и подобрување на самодовербата“. Боењето боенка не е уметничко изразување, па затоа не може да се нарече терапија со уметност, бидејќи кај овој вид на терапија најважна е комуникацијата која што се воспоставува помеѓу терапевтот и пациентот, нешто што кај боењето не постои. Боењето има терапевтски ефект, но не е терапија.„Боењето дефинитивно има терапевтски потенцијал да ја намали вознемиреноста и да доведе до состојба на смиреност“, истакнува Меригрејс Бирбириан – Marygrace Berberian арт терапевт и асистентка на „Програмата за арт терапија за дипломци“ на Универзитетот во Њујорк. На ист начин како и медитацијата, боењето овозможува заборавање на проблемите и мислите што не окупираат и помага да се фокусираме на моментот, на тој начин ослободувајќи од стрес и вознемиреност. Исто така, овие боенки можат да ги користат сите, дури и оние кои што немаат желба да се изразуваат на креативен начин.
Така, доколку сте во потрага по хоби кое што ќе ве опушти, овие боенки се можеби она што ви е потребно. Тие изобилуваат со прекрасни илустрации кои што ќе ви го подобрат расположението и ќе ве релаксираат. Боенки за возрасни може да се најдат и во книжарниците низ Македонија.