Кога децата знаат дека родителите се заинтересирани за она што се случува во училиштето, тие и посериозно ќе го сфатат секојдневното одење во училиште, учењето и извршувањето на работните обврски.
Поддршката од родителите е клучна за едукативен развој на детето. Како да му помогнете на вашето дете да стекне работни навики и правилно да го оформи својот едукативен карактер? Во прилог се 5 начини како да се вклучите во едукативниот процес на вашето дете со цел да им помогнете да постанат успешни ученици и добро образовани личности.
1. Не ги пропуштајте ги средби со наставниците
Вообичаено на децата им оди подобро на училиште кога родителите се вклучени во нивниот едукативен живот. Редовното учество на родителот на состаноци и средби со наставниците е еден начин да се биде вклучен и информиран во животот на детето. Ваквите средби вообичаено се одржуваат два-три пати годишно и на нив се разговара за едукативниот напредок на децата.
Состаноците помеѓу родителите и наставниците се шанса да се започне или да се продолжи дискусија за вашето дете во врска со неговите оцени, однесување и сл. Средбите со наставниците, исто така, ќе му овозможат на вашето дете да знае дека она што се случувало на училиште и за кое се разговарало на средбата со наставникот потоа треба да се поразговара дома.
2. Посетувајте го училиштето и неговата веб-страница
Познавањето на надворешноста и внатрешноста на училишната зграда во којашто вашето дете поминува барем половина од својот ден може да помогне да се поврзете со него кога се зборува за училишниот ден и што се случувало за време на часовите и паузите за ручек. Оттука, е добро да се знае локацијата на главната канцеларија, предавалните, бифето, вежбалницата, спортските терени итн.
На веб-страницата на училиштата вообичаено може да се најдат информации за:
- училишниот календар;
- контакт од директорот и наставниците;
- распоред на училишни настани и патувања;
- дати на тестирања.
3. Охрабрувајте редовно извршување на домашните задачи
Со задавање и извршувањето на домашни задачи во основно училиште се стекнува навика за учење, како и се вежбаат важни вештини за учењето. Домашните задачи на децата, исто така, им помагаат да го развијат чувството за одговорност и посветеност, како и работна етика од која ќе имаат корист и надвор од училницата.
За полесно да го охрабрите и мотивирате вашето дете да ги завршува навремено училишните задачи, обидете се да создадете пријатна домашна атмосфера. Одвојте еден добро осветлен, удобен и тивок простор во домот и уредете го да биде училишното катче на детето каде што ќе ги извшува домашните обврски. Избегнувајте предмети, како ТВ или радио, што може да му го одвлекуваат вниманието во часовите кога му е потребна концентрација за учење или пишување. Кога вашето дете ќе учи, бидете присутни и спремни да одговорите на неговите прашања, да му дадете инструкции, доколку му се потребни, и да му помогнете кога ќе наиде на нешто нејасно.
4. Посветете внимание на неговата редовност во училиште
Кога детето е болно, има настинка или вирус, или се жали на било каква болка заради која не може да оди на училиште треба да се земе слободен ден и да останат дома. Настрана од ова, здравите деца треба да се охрабруваат да не отсуствуваат од училиште, да пристигнуваат на часовите навремено секој ден, затоа што секој изгубен час или незавршена домашна задача може да биде стресна и да влијае на неговиот напредок во учењето и во успехот на училиште.
Ако вашето дете отсуствува многу од училиште заради болест, посетете го училиштето и разговарајте со наставникот за секоја работа што треба да се заврши за детето да не заостанува со новиот материјал.
Понекогаш децата сакаат да останат дома поради проблеми со соучениците, задачи или оценки, или дури и заради проблем со наставниците. Ова може да резултира со вистински симптоми, како главоболки или болка во желудникот. Доколку се сомневате дека можеби вашето дете има проблем во училиште, разговарајте со него, а потоа и со наставникот за да дознаете повеќе за она што ја предизвикува неговата анксиозност. Во вакви случаи од голема помош може да биде и училишниот советник или психолог.
5. Одвојте време да разговарате за училиште
Вообичаено е лесно да се зборува со децата на училишна возраст во врска со она што се случува во класот, како и за новостите во училиште. Но понекогаш родителите може да се зафатени и да заборават да ги постават едноставните прашања, кои пак може да имаат негативно влијание врз успехот на децата. Најдете време да разговарате со вашето дете за тоа да знае дека она што се случува на училиште е важно за вас и дека сакате да бидете целосно вклучени во нивниот живот. Кога децата знаат дека родителите се заинтересирани за она што се случува во училиштето, тие и посериозно ќе го сфатат секојдневното одење во училиште, учењето и извршувањето на работните обврски.
