За да бидете доследни и успешни во тоа што сакате: држење одредена диета, слабеење, вежбање, зголемување на мускулната маса или во било кое хоби, потребно е да бидете постојано мотивирани, амбициозни и полни со ентузијазам. Бидете реални кон себе – не се преценувајте, но и не се потценувајте.
Уверување дека мора да се биде совршен/а
Перфекционизмот врши огромен притисок што најчесто создава големи разочарувања, без разлика колку успешно ви оди тоа што го правите. На луѓето тешко им е да се соочат со моментите на губење и пораз, па затоа често пати избегнуваме да правиме работи што ги сакаме, само бидејќи можат да направат да се чувствуваме лошо.
Споредување со другите
Натпреварувањето е вистинска загуба на време и создава одложувања на успехот. Многумина се изненадуваат кога ќе сфатат дека „подобрите“ луѓе од нив во нешто, во суштина се чувствуваат слично или исто како нив – едноставно не им оди толку совршено, како што тоа совршено изгледа. Наместо да им завидувате и да се споредувате и натпреварувате со нив, дознајте што е клучот на нивната тајна за успех. Многумина велат дека со опкружувањето на себе си со успешни луѓе може да помогне самите да станете успешни многу побрзо.
Неверување во себе
Успехот не е настан кој се чека да се случи само еднаш во животот и поради кој сè останато станува неважно. Постојат многу мерила за успех.
Успехот претставува континуирана низа од упорни добри резултати во различни сфери од животот.
Сепак, не треба да ве оценува некој друг, бидејќи нели живеете пред сè за самите себе, па затоа мерило за успешност во што и да правите треба да биде вашата среќа, односно колку вие се чувствувате задоволни од себе.
Премногу цели наеднаш
Не е доволно само да се има цели – тие не се остваруваат сами. Фокусирањето ја одржува мотивацијата на одредено ниво. Расеаноста на сите страни, односно мултитаскингот, е многу стресна активност и ретко ја исполнува личноста. Како што вели една народна мудрост: „Не можете наеднаш сто чавки за опаш да фатите“. Одберете ги внимателно приоритетите и не дозволувајте му на некој друг да ја преземе контролата врз вас. Научете да одбиете и да кажете „НЕ“ смирено и сигурно.
Немање цели
Кога сакате нешто да правите и да бидете успешни во тоа, потребно е да си зацртате неколку цели во тој поглед, но тие не треба да бидат нереални и преголеми. Доколку пак, не се чувствувате исполнети и не знаете што да правите, истражете кои активности би можеле да му придонесат на општеството, истражете во што сте добри и што ви оди најлесно, односно што ви причинува најголемо задоволство. Многу лесно можете да станете препознатливи и ценети, но најважно е тоа што ќе го одберете да го правите, да го правите поради вашето лично задоволство, а не заради „наградата“. Само така успехот ќе биде одржлив. Задоволството нека биде најголемата награда, а сè друго само ќе си дојде.
Непрославувањето на успесите
Наградете се и почитувајте се себе си, односно однесувајте се кон себе онака како што сакате другите да се однесуваат со вас. „Прославата“ на секој мал успех не мора да биде скапа. Важен е гестот и одбележувањето на успесите, за да не ја изгубите мотивацијата.
Не одделување време за одмор
Депресијата е најголемиот непријател на мотивацијата, а ништо не предизвикува подобро депресија и демотивација како премореност и исцрпеност. Бидете секогаш одморени во духот, телото и умот: спијте доволно, хранете се правилно, вежбајте, медитирајте и не се преоптоварувајте и преценувајте.
Неучење
Доколку мотивацијата е горивото, тогаш новите идеи се моторот. Затоа зголемете го вашето знаење – во него е силата и моќта и збогатете се со нови искуства. Отворете ги сопствените хоризонти, читајте, гледајте едукативни емисии и филмови, комуницирајте со интересни луѓе и бидете спремни на нови предизвици.
Започнете со вежбање денес!
