Ново истражување го потврдува она што на сите ни е познато, а тоа е дека вежбањето е лек
Сите знаеме дека вежбањето е добро за нас, тоа е добро за срцето и воопшто за здравјето. Но ова звучи премногу општо и недоволно мотивирачки. Новото истражување истакнува дека вежбањето буквално е лек. Истражувањето открива дека дури и минимална физичка активност поттикнува мноштво позитивни промени во телото.
„Не постои лек кој може да помогне колку што може вежбањето“, вели Клод Бокард – Claude Bouchard, директор на лабораторијата за човечка генетика во биотехнолошкиот истражувачки центар „Пенингтон“ од Луизијана. „И доколку постоеше таков лек, тој би бил многу скап.“, вели тој. Во продолжение, прочитајте неколку дополнителни причини зошто вежбањето е подобро од било кој лек.
Ве прави помлади
Иако стареењето е неминовно, со редовното вежбање процесот на стареење може да се забави. Исто така, вежбањето го продолжува животниот век за пет години, пишува „Тајмс“. Истражувачите, со набљудување на теломерите (кои што функционираат како капачиња на ДНК и кои при процесот на стареење се намалуваат), открија дека вежбањето го зголемува нивото на молекулите кои што ги заштитуваат овие теломери, со што клетките остануваат во „помлада“ состојба, што значи дека овој процес ве прави помлади.
Делува побрзо од апче
Доколку на еден стандарден лек му се потребни неколку денови за да делува, на вежбањето му е потребно буквално една минута. Имајќи го овој податок во предвид, сè попопуларни се вежбите со висок интервал (HIT – High Intensity Training), како кросфитот и фитнес програмата P90X.
Помага при воспаление
Според психологот Хекни – Anthony Hackney, континуираното вежбање во голема мера помага при намалување на воспалителните процеси во телото. Бројни истражувања пак, укажуваат дека доколку сакаме да го намалиме воспалението, најкорисни се оние вежби со послаб интензитет. Вежбањето од 60 минути со среден интензитет ги намалува воспалителните процеси, го зголемува лачењето на серотонин и ендорфин и ја подобрува хемијата во мозокот.
