Редовното вежбање и правилната исхрана се од голема важност и во текот на летото за да останете во одлична физичка и здравствена форма преку целата година
Зимскиот период сам по себе е идеален за практикување некаква физичка активност како подготовка за летото. Многумина сметаат дека доколку одлично се навежбале во текот на целата зима, немаат потреба да продолжат да вежбаат и во текот на летото и токму овде ја прават најголемата грешка. Свесни сме дека редовното вежбање, одржувањето на физичката форма и грижата за подобро здравје во летните месеци не е воопшто едноставно, особено во текот на одморот кога се релаксираме и си дозволуваме да уживаме во секој тип на храна и пијалак што „врие“ со калории.
По цела година активно работење или студирање, секој би рекол дека заслужил да се почести со нешто вкусно и неодоливо, како парче чоколадна торта, чаша пенливо пиво и вино или голем и сочен сладолед. Ваквите мали слатки задоволства што вообичаено си ги „дозволуваме“ додека одмораме на плажа или на планина во комбинација со редовното лежење и непрактикување било каква физичка активност во летниот период, знаат многу да нè чинат во текот на целата година. Ви претставуваме 3 многу важни работи што треба да не заборавате редовно да ги правите за да останете во топ физичка форма и да го одржите доброто здравје во текот на целото лето.
1. Не ги прескокнувајте оброците
Каде и да го поминувате летото и летниот одмор не заборавајте да се храните правилно и здраво. Една од поважните работи е да не ги прескокнувате оброците, без разлика дали сте на плажа на пуст остров или на некаде високо на планина. Секогаш потрудете се да бидете соодветно подготвени за целиот ден и активностите што претстојат, бидејќи неправилната исхрана и прескокнувањето на појадокот или ручекот кои ќе ги замените со обилно вечерање ќе резултираат со зголемување на килограмите и ослабување на имунитетот.
2. Внимавајте што јадете и пиете
Летото секогаш ја поттикнува желбата за освежувачки сладолед или коктел на плажа. Во исто време во лето, почести се и собиранките со блиските пријатели и семејството кои вообичаено завршуваат со нарачка на голема семејна пица, кока кола и вкусен десерт. Особено внимавајте на овие моменти и обидете се да им предложите на пријателите или семејството заедно да зготвите вкусна и здрава вечера или ручек. На овој начин ќе поминете еден забавен ден, готвејќи во друштво на најблиските и хранејќи се правилно.
3. Не ја исклучувајте целосно физичката активност
Во летните месеци многумина престануваат со физичките активности кои ги практикувале во текот на зимата. Некои го прават тоа заради топлото време кое ја активира мрзеливоста и безволноста, други затоа што групата во која редовно вежбале се распуштила, а трети бидејќи заминале на одмор. Обидете се овие причини да не ви бидат изговор за целосно исклучување на физичката активност во текот на летото, напротив нека ви бидат предизвик, доколку сте дома, продолжете да вежбате сами во пријатен домашен амбиент со омилената музика или пак, доколку сте на плажа, трчајте или играјте одбојка покрај море.
