Флашираната вода се продава со рок на траење на амбалажата, но тоа не значи дека таа не е добра за пиење по истекот на означениот датум на шишето
Доколку оставите чаша со вода извесно време, а потоа се напиете од неа, можете да бидете сведоци на чудниот вкус што таа го добива со текот на времето. Првата претпоставка е дека водата започнала да се расипува, а причината за тоа е изложеноста на воздухот. Изложеноста на водата на атмосферските влијанија ја прави идеално живеалиште за прашина и останати микроби, па и отрови. Овој процес ја прави водата малку покисела. Слично е и со отстоената вода затворена во шише.
Често пати не обрнуваме внимание на важноста на водата во диетата и ја забораваме важноста што водата ја има во нашиот живот, бидејќи основата на секоја наша клетка е токму водата.
Мислењето што многумина го делат, дека не е важно каква е водата, може да има кобни последици по здравјето. Во услови кога немаме друг избор и потребни ни се течности, веројатно ваквата вода е безбедна за пиење уште некој ден откако сме ја оставиле. Сепак, секогаш се препорачува пиење на чиста и свежа вода.
Морнарите биле пијаници бидејќи немале друг избор
Во минатото, луѓето не обрнувале големо внимание на чистотата на водата и не знаеле кои се најсоодветните начини за заштита на водата за пиење и нејзино безбедно чување. Кога европските морнари заминувале на долги крстарења, водата ја чувале во дрвени буриња. По само неколку недели во водата започнувале да се развиваат алги, па затоа морнарите морале да дојдат до алтернативно решение. Водата ја мешале со алкохол, а кога ќе снемало вода, продолжувале со алкохол, кој уште повеќе го дехидрирал нивниот организам. Кога ќе завршело пивото на палубата, тие се префрлале на празнење на нивниот специјалитет – румот. Алкохолот ги убивал бактериите од водата, меѓутоа ја убивал и нивната свест и како последица им се јавувала „утринска морска болест“, односно мамурлак.
Денес, водата можеме да ја чуваме без воопшто да мораме да се грижиме за нејзината безбедност. Експертите од Центaрот за контрола на болести и превенција (CDC), истакнуваат дека флашираната вода е најбезбедна, само доколку е чувана правилно, доколку е добро затворена и шишето не е физички оштетено. Опасноста што во себе може да ја носат некои брендови на флаширана вода, се крие во амбалажите. Некои видови на пластика под дејство на топлина ослободуваат хемикалии како што е хормоналниот дисруптор бисфенол-А (BPA).
Добрата страна на флашираната вода е што е заштитена од прашина, кислород и микроорганизми. Од CDC советуваат дека флашираната вода е безбедна за пиење многу долг временски период. Пластичните шишиња се пропустливи. Тие велат дека рокот на траење на водата може да се игнорира само доколку водата е чувана подалеку од директна сончева светлина и топлина, подалеку од штетни и опасни материи како пестициди и горива и само под услов шишето да не е оштетено!
Молекулите на H2O не се расипуваат
Од DNews велат дека водата не содржи во себе протеини и шеќери како храната, па затоа микробите не ја консумираат и расипуваат. Ова не значи дека хемиската структура на водата не се менува кога е изложена на надворешните влијанија. Изложена на воздух, водата апсорбира јаглерод диоксид и многу мала количина од CO2 е конвертирана во јаглеродна киселина. Кога јаглеродната киселина губи некои протони, се претвора во бикарбонат или карбонат. Ова ја намалува pH вредноста на водата, правејќи ја покисела и поневкусна.
[interaction id=”57348a5f5dc790645b3d6843″] Ваквата вода и покрај неквалитетниот вкус, не значи дека е опасна за луѓето, но може да биде штетна за школките. Карбонската киселина формира околу 4 милиони пати повеќе бикарбонат од карбонат, а школките имаат потреба од карбонат за изградба на нивната лушпа. Поради тоа колку е водата покисела, толку помек ќе биде нивниот „надворешен `рбет“.
Индустриската револуција и небрежноста на луѓето за СО2 во атмосферата ги направи океаните многу покисели и многу од живиот свет во нив изумира и е загрозен поради тоа.
За луѓето, малата промена во pH вредноста на водата не може да наштети. Молекулите на H2O не се расипуваат, туку водата станува домаќин на други молекули и организми. Проблемите што можат да се појават од пиење на застоена вода се предизвикани од бактериите. Водата од водовод и флашираната вода има додаден хлор во неа, што им оневозможува на микробите да се размножуваат за околу ден до два. Но, по истекот на овој период микробите може буквално да полудат.
Застоената вода, исто така, може да стане живеалиште на габи, алги, како и ларви од комарци, што може да биде фатално по здравјето. Од DNews, исто така, велат дека нема нешто погрозно од прашината што кружи во домот кога ќе заврши во незаштитена вода за пиење. И во овој случај водата може да се исчисти со хемикалии како јод или хлор или пак, може да биде филтрирана или превриена.
