Студијата нагласува дека добриот и квалитетен сон е уште едно важно оружје во борбата против срцевите заболувања – фактор што секојдневно го компромитираме.
Нова студија, објавена на 14 јануари во списанието на Американскиот колеџ за кардиологија, го поврза здравјето на срцето со добриот и квалитетен сон. Во студијата се посочува дека за срцето да остане здраво, помеѓу другите фактори, потребно е и да спиеме минимум по шест часа во текот на ноќта.
Студијата покажа дека хроничниот недостаток на сон и слабиот квалитет на спиењето ги зголемуваат шансите за акумулација на масни наслаги во артериите, атеросклероза, состојба којашто ги зголемува шансите за срцев и мозочен удар.
„Постојат многу начини за борба против срцевите заболувања, вклучувајќи ги и лековите припишани од лекар, физичката активност и исхраната. Но оваа студија нагласува дека добриот и квалитетен сон е уште едно важно оружје во борбата против срцевите заболувања – фактор што секојдневно го компромитираме“, изјави Хозе Ордовас, истражувач во Националниот центар за кардиоваскуларни истражувања во Мадрид, Шпанија.
Во новото истражување, тимот користел коронарен ултразвук и КТ-скенови за следење на здравјето на артериите на речиси 4.000 возрасни лица на територијата на Шпанија. Учесниците во студијата имале просечна возраст од 46 години и немале срцеви заболувања на почетокот на студијата.
„Студијата не може да докаже причина и ефект, но луѓето кои спиеја помалку од шест часа во текот на ноќта имаа 27 отсто поголема веројатност да имаат атеросклероза на артериите низ целото тело, отколку оние кои спиеја од седу до осум часа во текот на ноќта“, потенцираа Ордовас и неговите колеги.
Премногу спиење, исто така, не се покажало дека има позитивен ефект за здравјето на срцето. Имено, студијата покажала дека жените кои спиеле повеќе од осум часа во текот на една ноќ имале зголемен ризик за атеросклероза.
Учесниците кои имаме неквалитетен сон, односно оние коишто имале потешкотии со заспивање и често се буделе во текот на ноќта, исто така, имале за 34 отсто поголема веројатност да имаат атеросклероза, во споредба со оние коишто имале добар квалитет на сонот.
„Ова е прва студија која покажа дека објективно измерениот сон е независно поврзан со атеросклероза на артериите низ целото тело, а не само во срцето. Луѓето кои имаа краток и неквалитетен сон, исто така, имаатенденција да консумираат поголемо количество на кофеин и алкохол. Всушност, многу луѓе сметаат дека алкохолот е добар поттикнувач на спиење, но важно е да се потенцира дека истиот има и контра-ефект. Односно ако пиете алкохол, може да се будите по краток период на спиење и да имате потешкотии одново да заспиете. Дополнително, честопати спиењето по консумацијата на алкохол има лош квалитет“, истакна Ордовас.
Двајца експерти во САД се согласија со оваа студија дека спиењето е клучна компонента за одржување на кардиоваскуларното здравје.
„Додека директната причинско-последична врска помеѓу спиењето и здравјето на срцето останува нејасна, контролирањето на навиките за спиење конечно се препознава како важен фактор за подобрување на здравјето на срцето во медицинскиот свет“, вели д-р Еугенија Џианос.
Џианос смета дека однесувањата на една личност во будните часови може да ја објасни поврзаноста со спиењето. Тоа е затоа што пациентите со добри навики на спиење имаат енергија да бидат физички активни, да се исхрануваат здраво и правилно да се справуваат со стресот.
Експертите сметаат дека новата студија отвора врата за понатамошни испитувања со цел да се покаже причината и последицата помеѓу слабиот квалитет на сонот и појавата на атеросклероза.
