Брокулата е меѓу зеленчуците што содржат многубројни витамини и минерали што се од големо значење за одржувањето на доброто здравје
Кога станува збор за консумирање на зелен зеленчук, богат со витамини и минерали што се неопходни за одржување на нашето здравје, брокулата е на врвот на листата. Брокулата е дел од семејството зеленчуци под името „зелки“, лат. brassicaceae, во друштво со марулата, зелката и карфиолот. Таа е богата со многу витамини и минерали, како и растителни влакна, што се есенцијални за доброто здравје на човекот.
Витамини и минерали што ги содржи брокулата
Помеѓу витамините што ги содржи брокулата, најбројни се К, Ц и Б6, додека помеѓу минералите најбројни се хромот, фосфорот и калиумот. Зошто му се потребни овие витамини и минерали на организмот?
Витамин К
Витаминот К спаѓа во групата на витамини растворливи во масти. Овој витамин е од голема важност за функцијата на протеините што се важни за коагулација на крвта. Витаминот К е есенцијален за зајакнување на коските, а исто така помага и во лекување на внатрешни крварења и во намалувањето на обилното менструално крварење.
Витамин Ц
Витаминот Ц спаѓа во групата на витамини растворливи во вода и е најефикасниот антиоксиданс помеѓу витамините во оваа група. Витаминот Ц е многу важен за синтезата на колагенот, протеин што е есенцијален за здравјето на коските и кожата.
Витамин Б6
Витаминот Б6 е важен за формирањето на аминокиселините, а со тоа и на протеините и на хормоните. Витамин Б6 е есенцијален за синтезата на некои хормони, како адреналинот и допаминот. Тој е неопходен за правилна работа на мозокот и на централниот нервен систем, како и на мускулите.
Хром
Хромот е главен стимулант на метаболизмот на шеќерите. Овој минерал го засилува дејството на инсулинот и го регулира нивото на шеќерот во крвта, па оттука се препорачува кај лица со дијабетес. Исто така, хромот помага во развојот на мускулите и во растот, како и во намалувањето на крвниот притисок.
Фосфор
По калциумот, фосфорот е вториот есенцијален минерал за одржување на доброто здравје и работа на органите кај човекот. Овој минерал е неоходен за изградба и формирањето на коските и забите. Меѓу другото, фосфорот ја стимулира работата на мускулите и придонесува за растењето и обновувањето на ткивата. Фосфорот поттикнува правилна работа на срцето и бубрезите и развој на ткивата.
Калиум
Калиумот е минерал и електролит што е важен за функцијата на нервите и за контракцијата на срцевите мускули. Калиумот го намалува високиот крвен притисок и го намалува ризикот од појава на аритмија. Исто така, овој минерал помага и во намалувањето на нивото на холестерол во крвта.
Здравствени придобивки од брокулата
Го намалува холестеролот во крвта
Поради високото количество на калиум, брокулата е зеленчук што може да помогне во намалувањето на нивото на холестерол во крвта.
Делува како силен антиоксидант
Од сите зеленчуци што спаѓаат во групата на „зелки“, брокулата се издвојува како растение што содржи најголемо количество на витамин Ц и други антиоксиданти како бетакаротен, лутеин и зеаксатин.
Ги зацврстува коските
Заради големото количество на витаминот К, брокулата претставува зеленчук што е од голема важност за правилно обликување на коските кај човекот. Витаминот К го подобрува здравјето на коските, а исто така може да помогне за регулирање на густината на коските.
Ги зајакнува срцето и крвните садови
Докажано е дека брокулата го одржува здравјето на срцето и на крвните садови. Таа им дава еластичност на крвните садови и со тоа ја подобува циркулацијата на крвта. Исто така, брокулата го зголемува производството на ензими кои го штитат срцето од разни оштетувања и кардиоваскуларни заболувања.
