Нова студија покажува зошто некои луѓе се адреналински зависници
Авантуристите се склони кон предизвици и ризично однесување, бидејќи не можат поинаку, открива новото истражување направено врз анатомија на мозокот. Истражувањето кое ја проучувало структурата на мозокот, тврди дека оние кои преземаат ризици имаат различен мозок од оние кои што се сметаат за поконзервативни. Се открило дека импулсивните луѓе и трагачите по возбуда, имаат помалку сива маса во нивниот мозок.
Во студијата учествувале повеќе од 1,200 млади луѓе на возраст од 18 до 35 години, без историја на зависности.
Научниците на чело со проф. Аврам Холмс од универзитетот „Јеил“, заедно со истражувачи од „Харвард“ и општата болница „Масачусец“, користеле магнетна резонанца – MRI за скенирање на мозоците на волонтерите. Тие ја измериле големината на одредени делови на мозокот кај секој учесник засебно и ги споредиле со резултатите од прашалниците поврзани со нивното однесување. Волонтерите биле прашани за нивната потреба од нови и интензивни искуства, желбата за ризик и дали донесуваат брзи и непромислени одлуки. Исто така, учесниците биле испитувани и за нивните навики, односно за употреба и консумирање на алкохол, цигари и кофеин.
Се открило дека оние со високо ниво на стимулација, односно возбуда, имале редуцирана дебелина во оние делови на мозокот задолжени за донесување одлуки и самоконтрола.
Кај овие два конкретни делови, се виделе најголеми промени. Врската била подеднакво силна кај оние кои што не консумирале дрога и оние кои земале дрога, што докажува дека мозочната структура влијае врз однесувањето, а не обратно.
