Чувството за себе и самодовербата се формираат од најрана возраст а најзаслужни се секако родителите и начинот на воспитување
Навреме изградената самодоверба кај децата значи ментално здравје и социјална среќа понатаму во животот.
Самодовербата изградена врз постојани пофалби е надуен балон кој лесно ќе пукне при првата животна криза, додека пак самодовербата изградена врз достигнувања е онаа што ќе постави здрава основа за силни возрасни индивидуи подготвени да се справат со сите животни предизвици.
И покрај тоа што секое дете е различно, родителите сепак можат да се водат според одредени насоки кои што ќе им помогнат да воспитаат самоуверено и пред сè среќно дете.
Давање комплименти
Секако дека треба постојано да го поттикнувате и охрабрувате вашето дете, но секогаш бидете свесни за комплиментите што ги давате. На пример, комплиментот може да има и спротивен ефект од очекуваниот, доколку го пофалите вашето дете дека никогаш во животот не сте виделе поубаво нешто од, на пример, кулата што ја изградило. Доколку детето сфати дека тоа не е всушност точно и дека постојат многу поубави кули, тоа ќе почне да ги игнорира вашите комплименти дури и тогаш кога се целосно искрени. Наместо тоа, пофалете го за помали работи и секако, бидете искрени.
Работете на својата самодоверба
Родителството често има терапевтско дејство. Децата знаат да го „извадат“ најдоброто но и најлошото од родителите. Доколку имате неразрешени проблеми со самодовербата од минатото, бидете сигурни дека тие во одреден момент ќе излезат на површина. Доколку е потребно, консултирајте и разговарајте со психолог, со цел да бидете смирен и трпелив родител.
Бидете позитивен пример
Децата најпрво учат преку имитирање на постапките на луѓето околу нив, бидејќи тоа е првиот начин на кој учиме и го спознаваме светот. Вие сте првите луѓе од кои вашето дете учи, затоа доколку сакате ментално силно дете со добро однесување, истите одлики треба да го поседувате и самите. Сепак, внимавајте да не создадете совршена нереална слика од себе, што нè води до следната точка,
Не бидете премногу заштитнички настроени
Не се обидувајте да го спасите вашето дете од секоја неповолна ситуација, туку некогаш оставете го самото на свој начин да ги помине препреките. Така, вашето дете ќе научи дека животот не е секогаш лесен и дека е потребно да се трудиш ако сакаш да успееш. Исто така, тоа треба да научи дека некогаш е во ред да не се успее или да се биде тажен. Децата учат за успех и стекнуваат самодоверба единствено преку самостојно решавање на препреките.
Доколку сте премногу заштитнички настроени вие всушност им правите штета наместо добро, бидејќи како возрасни индивидуи тие нема да знаат како да се соочат со проблемите и секогаш ќе ја бараат вашата помош.
Дозволете му на вашето дете само да донесува одлуки
Самостојното донесување на одлуки ја зајакнува самодовербата. При давањето на слобода при одлучување сепак поставете граници. На пример, не го прашувајте вашето тригодишно дете што сака за ручек, туку дајте му избор да одбере помеѓу две понудени решенија и не му сугерирајте.
Негувајте ги интересите на детето
Поддржувајте го вашето дете и охрабрувајте го да проба многу различни активности. Децата кои што имаат хоби се чувствуваат горди на својата специјалност, па затоа е поверојатно да бидат успешни и во останатите животни полиња.
