Кога надвор е жешко и сакате да се оладите, освежите и рехидрирате, внимавајте што ќе налеете во чашата. Не сите пијалаци се погодни за хидратација на организмот. Пијалаците со алкохол и кофеинот се диуретици, а најдобро е доколку пиете обична вода во текот на целиот ден
Водата е од особено значење за здравјето на човечкото тело, бидејќи околу 60% од човечкото тело на возрасен е составено од вода. Водата има бројни позитивни дејства. Пиењето вода е од особена важност за време на летото и високите температури, бидејќи тогаш телото губи големи количества на вода преку потење. Водата помага да се потисне чувството на глад, го потиснува апетитот и ни помага да не се прејадеме, но исто така водата помага полесно да се свари храната. Водата може да биде лек за многу болести, но може и да спречи многу болести. Таа ги прочистува ткивата и органите, а особено бубрезите и ни помага да немаме констипација. Водата ја разубавува кожата со акни. Водата може да ги зголеми енергетските нивоа и да ја подобри функцијата на мозокот. Водата исто така помага полесно да се справите со мамурлакот.
Причината за појава на камен во бубрег кај многу луѓе е токму несоодветната хидратација, т.е. хроничната дехидратација. Во такви случаи калциумот и другите минерали се таложат во бубрезите во вид на камчиња кои предизвикуваат страшни болки.
Правилната хидратацијата кај децата и бебињата е малку поразлична од возрасните, пред сè поради фактот што нивните тела се многу помали и содржат повеќе вода итн. Сепак, докторите на кои специјализација им е детската нефрологија истакнуваат дека во минатото кај децата речиси воопшто немало појава на камења во бубрези, сè до неодамна. „Во оваа област сум над 30 години и можам да кажам дека се до изминатите 10-15 години јас речиси никогаш не сум видел камчиња во бубрег кај децата“ – вели Д-р Роберт Вejс – Robert Weiss директор на одделот за педијатриска нефрологија во болницата за деца „Maria Fareri“ во медицинскиот центар „Westchester“ во Њујорк.
Колку вода ни е потребно?
Доколку имате некакви проблеми со бубезите и бубрежни дисфункции или пак, често ви се појавуваат отоци, не би требало да претерувате со консумирање на преголеми количества вода. Внесувањето на многу сол исто така влијае на појава на отоци, бидејќи солта ги задржува течностите во телото. Соодветното количество на вода која му е потребна секому, зависи и од висината и тежината на човекот, но и од начинот на живот – активен или пасивен.
Пиењето повеќе вода помага при слабеење. Водата го поттикнува метаболизмот и исфрлањето на непотребните метаболити од организмот.
Постојат различни мислења за тоа колку вода треба да се пие, но од сите може да се заклучи дека пожелно е да се консумира од 1,5 до 2 литри вода дневно. Нутриционистите велат дека вода треба да пиеме речиси постојано со мали голтки, дури и кога инстинктите не ни кажуваат дека сме жедни. Водата се препорачува да се пие наутро на празен стомак и пред секој оброк.
Многу видови на јадења во себе содржат вода, сепак многу од течностите и јадењата кои ги внесуваме во текот на денот претставуваат диуретици, кои оневозможуваат во телото да се задржат течностите. Доколку јадеме овошја и зеленчуци богати со вода, јадеме течна храна и пиеме други видови на течности, не мора да се грижиме за тоа дека ќе дехидрираме. Но, треба да внесуваме повеќе вода доколку пиеме на пример многу кафе, црн чај или алкохол. Треба да имаме во знаење исто така дека ништо не може да ја замени чистата минерална вода, без разлика дали е флаширана вода или вода од чешма погодна за пиење.
