Во многу случаи тестовите за рак на простата може да бидат погрешно позитивни, бидејќи зголеменото ниво на ПСА не секогаш подразбира рак на простата
Простата е малата жлезда сместена под мочниот меур што е дел од репродуктивниот систем кај мажите. Кај возрасен маж таа е со големина и форма на орев, а расте со текот на годините. Нејзината функција е да лачи бистар секрет што е во составот на спермата.
Најчестите заболувања на простатата кај мажите се: зголемена простата, простатит и рак на простата.
Ракот на простата се развива кога клетките на простатата стануваат абнормални и почнуваат неконтролирано да растат и да формираат тумори коишто метастазираат. Во раната фаза на ракот на простата, многу мажи немаат симптоми и оттука, тие не се свесни за болеста којашто полека се шири и може да ги зафати останатите органи. Ракот на простата може да се развие со месеци или години пред да се појават било какви симптоми. Токму затоа кај многу мажи ракот на простата се дијагностицира кога веќе е во средба или напредна фаза и е проширен надвор од простатата.
Кога се појавуваат симптоми, тие се најчесто: болка при уринирање или ејакулација, зачестено уринирање, крв во урината или спермата и сл.
Тестови за рак на простата
Скрининг тестовите за рак на простата го откриваат нивото на ПСА (простатичен специфичен антиген) во крвта. ПСА е гликопротеин што се лачи од простатичната жлезда и неговото ниво може да се измери со едноставен тест на крвта. Кога простатата е нападната од инфекции, воспаленија, зголемување или рак, таа лачи поголемо количество од нормалното на протеинот ПСА. Оттука, во многу случаи тестовите за рак на простата може да бидат погрешно позитивни, бидејќи зголеменото ниво на ПСА не секогаш подразбира рак на простата.
Фази на ракот на простата:
- рана фаза (во оваа фаза најчесто ракот сè уште не напреднал и не се проширил надвор од простата);
- средна фаза (најчеста фаза кога се дијагностицира ракот);
- напредна фаза (во оваа фаза најчесто ракот е проширен и зафатил некои од останатите органи);
Фактори што го зголемуваат ризикот за заболување од рак на простата:
Возраст: од рак на простата најчесто заболуваат мажите на возраст над 65 години, но шансите за заболување од истиот почнуваат да се зголемуваат веќе по 50-та година.
Раса: ризикот за заболување од рак на простата е најголем кај афро-американците, додека најмал кај азијците.
Семејна историја: кај мажите од семејство со историја на заболување од рак на простата ризикот за заболување е поголем.
Прекумерна тежина: шансите за заболување од рак на простата се поголеми кај мажите со прекумерна тежина;
Вообичаени третмани за третирање и лекување на ракот на простата
- целосно отстранување на простатичната жлезда (радикална простатектомија);
- радијација (терапија со зрачење што ги уништува канцерогените клетки);
- хемотерапија (третман со хемикалии што ги уништува канцерогените клетки);
- хормонска терапија (терапија што го спречува производството на тестостеронот што простатичните тумори го користат за растење);
- брахитерапија (зрачна терапија со радиоактивен изотоп што поставува директно на или во близина на туморот);
- криохирургија (хируршки третман за замрзнување и уништување на канцерогените клетки);
- терапија со ултразвук (терапија за затоплување и уништување на канцерогените клетки).
