Високиот крвен притисок за време на бременост може да предизвика сериозни последици кои се однесуваат на фетусот и на мајката. Доколку трае подолго време може да дојде до развивање на прееклампсија.
Гестациска хипертензија се дефинира како зголемување на артерискиот крвен притисок од 20-тата недела на бременоста. Високиот крвен притисок за време на бременост може да предизвика сериозни последици кои се однесуваат на фетусот и на мајката. Доколку трае подолго време може да дојде до развивање на прееклампсија.
Прееклампсијата се дефинира како гестациска хипертензија пропратена со еден од следните симптоми:
- Протеинурија;
- Присуство и влошување на еден или повеќе знаци, главоболка, недостиг на воздух, гадење, зголемени црнодробни ензими;
- Присуство на една или повеќе компликации – на пример, одлепување на плацентата или проблем со бубрезите.
Значителна протеинурија за време на бременост значи повеќе од 0,3 грама протеини во урината за период од 24 часа.
Причината за настанување на гестациска хипертензија и развој на прееклампсија не е позната. Се мисли дека оваа состојба е последица заради активирање на ендотелните клетки во луменот на крвните садови.
Ендотелната активација води до последици како што се нарушена функција на органите на бремената како и негативно влијание на тежината на плодот. Во почетокот бремената чувствува главоболка или недостаток на воздух што значи дека е нарушена циркулацијата. Нарушената циркулација може да се манифестира со различни симптоми во зависност од тоа кој орган е оштетен. Доколку е засегнат црниот дроб има зголемување на црнодробните ензими, при оштетување на бубрег покачување на креатинин и протеинурија, итн.
При прееклампсија плодот е изложен на сериозна опасност за интраутерина ретардација или олигоамнион (намалена количина на околуплодовата течност).
Симптоми
- Нагло отекување на рацете, нозете и лицето;
- Нагло покачување на килажата, заради задржувањето на течности во организмот;
- Болки во стомакот. При прееклампсијата обично болките се јавуваат во горниот дел од стомакот, под ребрата;
- Тешки главоболки;
- Намалено количество на урина или изостанување на мокрењето;
- Гадење и повраќање.
Стратегијата со која ќе се справи гинекологот зависи во која група спаѓа бремената жена
Во група со висок ризик спаѓаат бремени над 40 годишна возраст и прееклампсија во предходна бременост, бременост со близнаци, антифосфолипиден антитело синдром и тн. Група со низок ризик се бремени што не исполнуваат ниту еден од горенаведените критериуми.
Превенција на прееклампсија кај бремени со низок ризик за развој на прееклампсија е следната
- Внесување на калциум најмногу 1 грам на ден;
- Комплетно апстинирање од алкохол;
- Лесни аеробни вежби 30 минути дневно и движење;
- Одкажување од цигари;
- Внесување на фолна киселина три месеци пред планираната (концепција) бременост.
Горенаведените препораки се општи препораки кои можат да помогнат во нормалното износување на плодот.
Профилакса на прееклампсија на бремени жени кои спаѓаат во групата со висок ризик е:
- Ниска доза на ацетилсалицилнакиселина (75мг), која започнува да се пие пред 16-тата г.с;
- Внесување на калциум најмногу 1 грам на ден;
- Одмор и редукција на стрес;
- Апликација на нискомолекуларен хепарин за превенција на тромбемболични инциденти;
- Прием на магнезиум и L-аргинин и почитување на општите препораки од групата со низок ризик.
Третман на прееклампсија
Еднинствен вистински лек за прееклампсијата е да се роди бебето. Откако ќе се роди бебето, излегува и плацентата. Со тоа причината за болеста веќе ја нема.
Доколку се работи за блага прееклампсија, со крвен притисок (до 140/90), мало количество протеини во урината и помалку изразени други симптоми, прееклампсијата се третира доста успешно и со медикаменти. Тука спаѓаат: магнезиум, инфузии, антихипертензици и сл.
Доколку се работи за потежок случај на прееклампсија, се врши хоспитализирање на мајката и постојано се следи состојбата. Се превземаат мерки за одржување на бременоста до крај. Сепак понекогаш има потреба да се изврши предвремено породување.
Дали ќе се изврши предвремено породување, ќе зависи од повеќе фактори:
Колкави се ризиците за мајката од продолжување на бременоста
Колкави се ризиците за бебето, ако се одржи бременоста. Се смета дека колку повеќе се приближи терминот за породување, толку е подобро за бебето. Сепак во ретки случаи на потешка прееклампсија, продолжувањето на бременоста, може негативно да се одрази врз бебето (во случај да не прима доволно кислород или хранливи материи).
Колкави се шансите на бебето да преживее надвор
Лекарот може да ви предложи предвремено породување, доколку смета дека ризикот од продолжување на бременоста е поголем, отколку ризикот од предвременото породување. Сепак треба да знаете дека нај важно е навременото дијагностицирање и третирање на болеста.
