Силно тресење на новороденче или доенче може да предизвика мозочно крварење
Грижата за најмалите претставува голем животен предизвик, особено за младите родители. Без оглед дали во моментот сте родител или не, треба да сте запознаени со овој синдром наречен синдром на „тресено бебе“. Оваа состојба која се предизвикува со неконтролирано тресење на бебето, значи повреда на мозокот кај новороденче што може да доведе до сериозни повреди и да предизвика трајни оштетувања.
Што го предизвикува
Силното и брзо тресење на новороденче ја мрда главата напред-назад. На тој начин, тенките жили во мозокот лесно можат да пукнат и да настане мозочно крварење. Тресењето најчесто е знак на немоќ и исфрустрираност доколку родителот или оној кој се грижи за бебето не може да го смири бебешкиот плач. Исто така, понекогаш родителот не е ни свесен дека некои негови постапки можат да го повредат нежното тело на бебето. Ова се однесува на поактивна игра со бебето или нежно фрлање во воздух. Колку и да се изведува внимателно и да изгледа дека бебето ужива во ова, подигањето во воздух претставува опасност бидејќи бебешката глава е тешка а вратот нежен, па додека главата оди наназад може да се случи мозочно крварење, отекување или трајна повреда на ‘рбетот.
Бебињата, иако некогаш изгледаат необично силни и еластични, всушност се кревки и нежни. Черепот кај новороденчето е мек и делумно развиен, па затоа неговата глава треба секогаш да се придржува во првите неколку месеци. Дури и во ситуации кога бебето (од некоја причина) престане со дишење, не смее да се тресе. Лекарите препорачуваат удирање по табаните, нишање на колевката или подигнување на бебето со придржување на главата. Корисно е да се знае дека овој синдром не се јавува исклучиво кај бебиња, туку и кај деца до 3 или 4 годишна возраст.
Симптоми:
- Опуштање на мускулите/млитавост;
- Екстремна раздразливост;
- Неможност да остане будно;
- Проблеми со дишење;
- Немање апетит;
- Никаква вокализација или смеење;
- Повраќање, бледило или помодрување;
- Напади, физички знаци односно модрици по телото. Во било кој од овие случаи, новороденчето веднаш треба да се однесе на лекар.
Последици
Пречки во развојот, слепост, глувост, епилептични напади, повреди на мозокот, проблеми при учење.
Третман
Најважно е воспоставување точна дијагноза и извршување детални прегледи како невролошки, офтамолошки и ортопедски. Бебето треба постојано да се испитува и внимателно да се следи неговиот развој како би се откриле и превенирале можни понатамошни проблеми.
Напомена: Имајте на ум, секогаш кога ангажирате лице кое што ќе се грижи за вашето бебе, да прашате дали се запознаени со овој синдром и неговите последици. Една дадилка мора да знае ваков вид на информации. Особено е важно да ангажирате лиценцирана дадилка, која ги знае овие работи. Поголемата грижа значи поголема сигурност за вашето дете.
