Трчањето е одлична активност која го активира цело тело и е корисна за целокупното здравје. Сепак, колку и да е едноставно, потребни се неколку насоки доколку сте почетник во трчањето
Го поминавте периодот на адаптација и контемплација, на сите сте им кажале дека планирате да трчате и сега останува уште да започнете со трчањето. Трчањето е едноставна и евтина рекреативност, но потребна е претходна подготовка за да избегнете повреди и други непријатности. Тренерите за трчање посочуваат неколку основни правила кои ќе ги надополниме со корисни совети, со цел да бидете целосно подготвени и точно запознаени со оваа многу корисна физичка активност.
Одберете соодветни патики за трчање
За трчање не е потребна скапа опрема, но соодветни патики се неопходни. Соодветниот избор на патики може да спречи повреди и да го направи трчањето пријатна и забавна активност. Пред да одите на купување, дознајте какво е вашето стапало, односно дознајте кој е вашиот степен на пронација. Исто така, важно е претходно да знаете на каков терен ќе трчате, бидејќи видот на патиката за трчање многу зависи и од мекоста, односно тврдоста на теренот.
Не ви се потребни два градници
Жени и девојки, не ви се потребни два градници за да трчате. Сè што ви треба е еден квалитетен градник за вежбање со соодветна поддршка, бидејќи удобноста при трчањето е најважна.
Загрејте се
Пред да започнете со трчање, задолжително загрејте се. Исто така, дополнителна активност која може да ја практикувате паралелно со трчањето, е подигањето тегови. Имено, заблуда е дека теговите ќе ви направат многу мускули, бидејќи подигањето тежина го зацврстува целото тело. Многумина од оние што трчаат, не обрнуваат внимание на горниот дел од телото и ги загреваат само нозете. Затегнат горен дел, значи добро држење на телото, кое што е основно за правилно трчање.
Бидете редовни
Доколку сте започнале со трчање, не се откажувајте. Подобро да бидете пократко време на патеката, а повеќе пати, отколку долго трчање еднаш неделно. Не правете големи временски паузи од едно до друго трчање, бидејќи после подолга пауза, телото мора повторно одново да се навикнува.
Не треба да трчате брзо
Не е задолжително брзо да трчате. Доколку се фокусирате секојпат да бидете побрзи, тоа може само да ве направи нервозни и да ве натера да се откажете. Подобро трчајте бавно, но подолго.
Трчањето надвор е потешко
Трчањето на отворено се разликува од трчањето на лента за трчање. Надворешните услови, како и разноликоста на теренот на кој ќе трчате, ќе го направи трчањето поголем предизвик, а воедно и поголемо уживање. Исто така, трчањето на отворено ќе ви ја зголеми издржливоста.
Станува полесно
Добрата вест поврзана со трчањето, е дека колку повеќе трчате, толку полесно станува. Не се форсирајте, на почеток трчајте колку да воспоставите свој ритам на трчање и правилно дишење. Кога првичното растојание ви стане пријатно, продолжете да трчате малку подалеку.
Одмарајте
Денот за одмор е многу важен за секој тренинг и неопходен за спречување на повреди. Предолгото вежбање може да биде повеќе штетно отколку корисно. Не предлагаме да се излежувате во тие денови за одмор, туку да правите лесни вежби за истегнување или јога вежби.
Слушајте го телото
Сите мислат дека трчањето треба да боли, но не е така. Болката алармира дека нешто не е во ред и малата болка на почеток, може да се претвори во хронична болка во иднина. Доколку имате вишок на килограми, можно е да се соочите со болки, бидејќи за активно трчање потребна е поголема мускулна маса на нозете. Доколку почувствувате болка во колената или зглобовите, задолжително одморете. Доколку болката не исчезне, одете на лекар.
