kako-da-ostanete-aktivni-na-rabotnoto-mesto_image
Споделете со пријателите!

Кога работиме околу 8 часа во текот на денот, наоѓањето на можности за да бидеме физички активни надвор од работното место може да биде голем предизвик.
Многумина од нас имаат работа што подразбира седење на канцелариски столови 8 или повеќе часови дневно. Токму ова поминување на долги часови во седечка положба носи многу ризици по нашето здравје. Имено, значителен број истражувања досега покажале дека пасивното седење подолг период е поврзано со зголемен ризик за прекумерна тежина, дијабетесот тип-2, срцеви заболувања и рак.

Прекумерното седење може, исто така, да го забави метаболизмот, кој има влијание врз способноста на телото да го регулира крвниот притисок и шеќерот во крвта, како и да ја намали телесните масти.

Оттука, активирањето на телото во текот на работниот ден е од големо значење бидејќи може значително да намали некои од горенаведените проблеми што му се закануваат на нашето здравје заради прекумерното седење.

Една студија покажа дека практикување на било каква физичка активност околу 30 минути во денот, 5 дена, секоја недела, без разлика дали тоа би било вежбање на справи во теретана, возење на велосипед или пешачење, може да спречи 1 од 12 смртни случаи на глобално ниво.

Физичката активност, исто така, може да нè заштити од стресот на работното место којшто може да доведе до нарушена ментална благосостојба, висок крвен притисок, како и зголемен ризик од заболување од депресија.
kako-da-ostanete-aktivni-na-rabotnoto-mesto_image1

Кога работиме околу 8 часа во текот на денот, наоѓањето на можности за да бидеме физички активни надвор од работното место може да биде голем предизвик. Сепак, постојат можности коишто може да помогнат да останеме активни и во текот на работните часови. Кои се тие?

Пешачење или возење велосипед до работното место

Во зависност од локацијата на вашето работно место и колку е истото оддалечено од вашиот дом, размислете на промената на начинот на којшто одите и се враќате од работа. Доколку користите автомобил или јавен превоз, заменете ги со возење велосипед или пешачење.

„Возењето велосипед се поврзува со намален ризик од заболување од рак и кардиоваскуларни болести.

Во споредба со возењето со автомобил или со јавен превоз, велосипедот е активност што се поврзува со намален ризик од заболување од рак и кардиоваскуларни болести. Освен тоа, луѓето кои пешачат или возат велосипед до работа имаат понизок индекс на телесна маса и помал процент на телесни масти отколку оние кои патуваат со автомобил или автобус.

Наодите од една студија спроведена на Универзитетот во Копенхаген во Данска докажуваат дека кај луѓето коишто имаат прекумерна тежина или се физички неактивни, велосипедизмот е исто толку ефикасен во намалувањето на вишокот маснотии како и вежбањето во теретана.

Станување и стоење почесто во работните часови

Едноставното станување од столот на работа за да се раздвижите може многу да помогне во намалување на ризикот од заболување од различни болести коишто се поврзани со предолгото седење.

Прочитајте:  Вежби во вода за децата со посебни потреби

Со цел да се намали времето поминато во седечка положба на работното место, тим експерти vo 2015 објави водич со совети во „British Journal of Sports Medicine“. Тие заклучија дека луѓето коишто работат во канцелариски простории и поминуваат многу часови во седечка положба треба да стојат најмалку 2 часа за време на нивниот работен ден. Истражувачите веруваат дека пешачењето и стоењето во текот на работниот ден може да бидат практични активности за оние коишто работат седејќи.

Се препорачува:

  • Стоење или практикување на лесна активност околу 2-4 часа во текот на работното време;
  • Користење на маси на кои освен седејќи може да се работи и стоејќи со цел да се направи пауза од долгото седење;
  • Избегнување на долго и статично стоење кое може да биде исто толку штетно колку и долгото седење;
  • Често менување на држењето на телото за да се спречат потенцијални мускулно-скелетни болки и замор.

Всушност, кога стануваат збор работните маси коишто дозволуваат работење во седечка и стоечка положба, многу компании ширум светот ја прифаќаат нивната употреба, бидејќи сè повеќе истражувања ги истакнуваат нивните придобивки.

Едно истражување спроведено на Универзитетот во Ајова открива дека вработените коишто работеле на вакви маси стоеле по речиси 60 минути повеќе во текот на работното време и намалиле до 87 повеќе калории во споредба со нивните колеги.

Почесто движење во и околу работниот простор

„Секој дополнителен час над 5 часа поминати во седечка положба, го зголемува ризикот од кардиоваскуларни болести за 0,2 отсто

Пасивноста на работното место вообичаено се јавува кога ќе се задлабочиме во работните задачи до оној степен што не забележуваме колку време сме поминале во седечка положба без да направиме пауза. Едно истражување покажа дека по поминати 5 часа во седечка положба, секој дополнителен час што ќе го поминеме седејќи, го зголемува ризикот од кардиоваскуларни болести за 0,2 отсто. Исто така, забележано е дека липопротеинот со ниска густина, односно лошиот холестерол се зголемува и липопротеинот со висока густина, односно добриот холестерол се намалува со сè подолгото седење.

Затоа експертите препорачуваат да се прават и најмали движења на работното место, како што се истегнување на рацете, нозете и грбот бидејќи тие може да помогнат во спречувањето на негативните ефекти што продолженото седење може да ги нанесе на нашето здравје. Истражувањата покажуваат дека функцијата на циркулаторниот систем се оштетува по 6 часа поминати во седечка положба. Оттука, се смета дека и 10-минутното движење на работното место по долго седење, може да го обнови здравјето на истиот.


Споделете со пријателите!