Околу 35 проценти од бремените жени се изложени на ризик од компликации во бременоста како резултат на недостаток на железо
Замор и недостаток на енергија, останување без здив, болка во градите, срцебиење и блед тен се само некој од симптомите кои се јавуваат при анемија. Недостатокот на железо е честа форма на анемија, која настанува кога телото нема доволно железо – минерал присутен во многу видови на храна, вклучувајќи месо, грав, ореви, житарици и суво овошје.
Според податоците на Светската здравствена организација (СЗО), повеќе од 30 отсто од светската популација се анемични, како резултат на недостаток на железо.
За лица на возраст од 19-50 години, Националниот институт за здравство (NIH) препорачува дневна доза на железо од 8 милиграми за мажи и 18 милиграми за жени, и вредност од 27 милиграми за време на бременоста. Како резултат на недостаток на железо, телото не произведува доволно хемоглобин – протеин во црвените крвни клетки што го пренесува кислородот од белите дробови до сите ткива на телото. Ова може да доведе до замор и недостиг на енергија, останување без здив, болка во градите, срцебиење и блед тен.
Недостаток на железо може да биде особено штетно за бремените жени и нивните деца. Жените имаат зголемена потреба од железо во текот на бременоста, со цел да се произведат дополнителни крвни клетки потребни за фетусот и нормалниот раст на плацентата. Железото исто така помага за нормално функционирање на протеинот наречен тироидна пероксидаза (TPO), што е од суштинско значење за производство на хормоните на тироидната жлезда. Бремената жена треба да произведе доволно хормони на тироидната жлезда за да може да се развие целосно мозокот на бебето. Ова е особено важно во првиот триместар од бременоста, кога кај фетусот треба да се развие тироидната жлезда.
Направена е клиничка студија со цел да се испита степенот на дефицит на железо во тек на бременоста и поврзаноста со проблеми на тироидната жлезда.
Д-р Крис Поуп- директор на Клиниката за ендокрини заболувања во Универзитетската болница (ULB) во Брисел, Белгија и неговите колеги, во оваа студија имале за цел да испитаат како влијае недостиг на железо во текот на бременоста и како тоа може да биде поврзано со развојот на проблеми со тироидната жлезда.
Во студијата биле вклучени 1.900 жени во текот на првиот триместар од бременоста. Тимот мерел нивоа на феритин (протеин кој е индикатор за ниво на железо), ниво на тироидна пероксидаза-TPO, нивоата на слободниот тироксин (FT4), и нивоа на тирео-стимулирачки хормон (TSH).
Истражувачите откриле дека 35 проценти од бремените имале недостаток на железо, од кои 10% имале автоимуно нарушување на тироидната жлезда. Кај бремени жени кај кои немало недостаток на железо, 6% имале тиреоиден автоимунитет.
Што е уште поважно, при мерење на нивоата на ТСХ, се покажало дека 20 проценти од бремените жени со недостиг на железо имаат субклинички хипотироидизам, каде што нивоата на ТСХ се благо покачени, во споредба со 16 проценти од оние испитанички кои немале недостаток на железо. Истражувачите велат дека нивните наоди покажуваат дека недостатокот на железо останува голем проблем, заради кое што сугерираат да се зголеми фокусот на идентификување и решавање на неговиот недостаток во текот на бременост.
Следниот нивни чекор ќе биде во насока да дознаат дали неповолен исход на бременоста зависи од автоимуно нарушување на тироидна жлезда, недостиг на железо или и двете. Исто така, ќе се испита дали недостаток на железо е факторот кој предизвикува нарушување на тироидната жлезда или обратно, иако постојат доста факти за поддршка на првата од овие две хипотези. Најважниот заклучок кој е сигурен од оваа студија е дека, секоја бремена жена и жена која планира бременост треба да го провери нивото на железо и функцијата на тироидната жлезда.
