Дали сте запознаени со влијанието на личната орална хигиена врз оралното здравје на вашето дете?
Бременоста може да предизвика бројни проблеми во оралното здравје на трудницата, како што се гингивитисот и ерозија на забите, но исто така истражувањата покажуваат дека повеќето мајки ги пренесуваат бактериите кои предизвикуваат кариес на своите децата. Децата со кариес на млечните заби имаат три пати поголема веројатност да развијат кариес и на нивните трајни заби. Кариесот понатаму може да доведе до рано губење на млечните заби, а тоа влијае на правилното растење на трајните заби. Затоа е битно практикување на добри хигиенски навики и здрава исхрана со избегнување на шеќери, во текот на бременоста и подоцна, бидејќи оралното здравје на мајката директно влијае на здравјето на детето. На овој начин ќе се превенира раната појава на кариес кај малите деца.
Дали е безбедна посетата на стоматолог за време на бременоста?
Постојат бројни небулози во однос на посетата на стоматолог во текот на бременоста сепак Американската стоматолошка и гинеколошка асоцијација се согласуваат дека грижата за оралното здравје за време на бременоста е безбедна и неопходна и дека одложувањето на посетата кај стоматолог може да има негативен ефект на оралното здравје. Иако посетата кај стоматолог е безбедна во текот на целата бременоста, можеби најидеално време е во текот на вториот триместар, бидејќи мачнинита и повраќањето исчезнуваат, ( најчести се во првиот триместар), а лежењето на стоматолошката столица може да биде поудобно во вториот отколку во третиот триместар, поради големината на стомакот. Сепак итната забоболката треба да се третира во било кој триместар од бременоста, додека некои избрани, козметички процедури треба да се одложат за периодот по породувањето. Денес постојат безбедни локални анестетици, аналгетици и антибиотици кои може да се користат и во текот на бременоста, а секој стоматолог е запознаен со нив.
Рендген снимките во текот на бременоста се сметаат за безбедни се додека е обезбедена соодветна заштита според американската стоматолошка асоцијација која препорачува со заштитна престилка да се покрие стомакот на трудницата за време на снимањето.
Гингивитис
Гингивитис во текот на бременоста е предизвикан од хормоналните промени кои го зголемуваат протокот на крв и предизвикуваат гингивите да бидат почувствителни, раздразливи и отечени.
Овие хормонални промени, исто така, го попречуваат нормалниот одговор на телото кон бактериите кои предизвикуваат пародонтални инфекции. Ова го олеснува создавањето на наслаги на забите и ве прави поподложни на гингивитис. Обично најизразен е гингивитисот во вториот триместар од бременоста.
Вложете дополнителни напори во грижата за вашите заби и во превенција на гингивитисот:
- Четкајте два пати на ден со мека четка и со паста за заби што содржи флуор во временски интервал од 2 минути;
- Чистете ги интерденталните простори со забен конец или друго интердентално средство.
Друг тип на пореметување на гингивите се пиогените грануломи кои се појавуваат за време на бременоста поради хормоналните промени. Пиогениот гранулом претставува локализирана хиперплазија на гингивата. Овој бениген раст на меките ткива најчесто е безболен, но може да го отежнуваат четкањето на забите. Преваленца на појавување е од 0,2-9,6% за време на бременост и најчесто се појавуваат во вториот или третиот триместар, растат брзо и обично регресираат по породувањето. Хируршка интервенција често не е потребна. Сепак, пиогените грануломи може да се отстранат во текот на вториот триместар од бременоста доколку се болни, крварат прекумерно и влијаат на загризот.
Ерозија на забите
Ерозија на забите е деминерализација на глеѓта-заштитниот надворешен слој на забите. Ерозијата се случува доколку забите се постојано изложени на киселини како при повраќање или рефлукс на желудечна киселина. Киселината во желудникот има многу ниска pH вредност што предизвикува оштетување на глеѓта.
За да спречите ерозија на забите, исплакнете ја устата со лажичка сода бикарбона растворена во чаша со вода. Плакнењето ќе превенира киселината да ги деминерализира забите. Исто така после плакнењето треба да се почека еден час пред четкање на забите.
Суплементи
За да го намалите ризикот од вродени дефекти на бебето, потребно е конзумирање на 600 мг фолна киселина секој ден во текот на бременост и јадење на храна богата со фолати.
