Американскиот дневник „Associated Press“ соопшти дека чистењето на заби со забен конец нема докажани здравствени придобивки.
Одржувањето на секојдневна орална хигиена е од голема важност за доброто здравје на забите и непцата. Оттука, често си ги поставуваме прашањата: Каква четка за заби треба да користиме? Каква паста за заби треба да користиме? Дали забниот конец е неопходен за добро здравје за забите?
Многу стоматолози и пародонтолози препорачуваат забниот конец редовно да се користи во оралната хигиена за да се одржи доброто здравје на забите и непцата. Тие советуваат редовна употреба на забниот конец за чистење на местата помеѓу забите каде што четките и другите препарати за орална хигиена не можат да допрат.
Наспроти ова, Американскиот дневник „Associated Press“ по разгледувањето на 25 научни студии соопшти дека чистењето на заби со забен конец нема докажани здравствени придобивки. По соопштението, Американското Министерство за здравство и социјални служби и Министерството за земјоделство го отстранија забниот конец од нивните препорачани упатства за добро орално здравје. Многу експерти по стоматологија и пародонтологија не се согласуваат со спроведените студии и објавата и продолжуваат да го препорачуваат забниот конец како неопходен во одржувањето на оралната хигиена.
„Додека истражувањето на поврзаноста помеѓу чистењето на забите и шуплините е нејасно, истражувањето за улогата на забниот конец во спречувањето на заболување на непцата е многу јасно. Затоа стоматолозите, хигиенистите и периодонтистите продолжуваат да го препорачуваат забниот конец“, вели Леена Паломо, вонреден професор по пародонтологија на универзитетот „Case Western Reserve“ во Кливленд, Охајо.
Еден преглед на 12 студии открил дека кај луѓето кои редовно ги четкале и чистеле забите со конец, постоела помала веројатност да имаат крвавење на непцата. Тие имале пониски нивоа на воспаление на непцата, наречено гингивитис, што е најраната фаза на заболување на непцата.
„Храната што останува помеѓу забите предизвикува воспаление на непцата и распаѓање на забите. Чистењето на забите со забен конец е единствениот начин да ги отстраните овие остатоци. Четката за заби едноставно не може да допре до тие делови меѓу забите“, изјави професорот по стоматологија Сиван Финкел од Њујоршкиот универзитетски колеџ за стоматологија.
Многумина страдаат од заболување на непцата, исто така познато како пародонтална болест. Тоа е хронична воспалителна болест која се појавува кога бактериите во забниот плак под линијата на непцето предизвикуваат оток и иритација. Ова заболување не се лекува, може да доведе до губење на непцата и губење на забите.
Пародонталната болест, исто така, се поврзува со срцеви заболувања, ревматоиден артритис, дијабетес и многу други здравствени состојби. Иако врската помеѓу заболувањето на непцата и здравјето не е сосема јасна, некои научници сметаат дека бактериите од устата може да завршат во крвотокот, каде што можат да придонесат за воспаление во други области, како што е срцето.
„Она што експертите го знаат е дека луѓето кои немаат заболување на непцата не можат да имаат здравствени проблеми како срцеви заболувања. Токму чистењето на забите со забен конец ги отстранува остатоците што содржат бактерии кои предизвикуваат заболување на непцата“, надополнува Паломо.
Американската академија за парадонтологија и Американската стоматолошка асоцијација препорачуваат да се користи забен конец. Всушност, многу стоматолози и пародонтолози велат дека причината поради која тие препорачуваат да се чистат забите со конец не е поради истражувањата, туку поради она што го гледаат кај нивните пациенти.
