„Stop Men [From] Dying Too Young“ е темата на „Мовембер“ 2016 којашто ќе биде акцентирана од кампањи и настани посветени на покревање на свеста за честите самоубиства кај машкиот пол
Месецот ноември, месецот посветен на машкото здравје, насекаде познат како „Мовембер“ започна со впечатлив старт одбележан од значајна урбана инсталација во Австралија. Станува збор за инсталацијата на плажата „Bondi“ во Сиднеј каде што 191 пар машки обувки ги симболизираа загубените животи на мажи и млади момчиња во Австралија во месец октомври. Ноември, месецот што има и забавна модна нота – мустаќите што се заштитен знак преку кој мажите ја даваат својата поддршка и ја подигаат свеста за нивното здравје, оваа година започна со инсталацијата со сериозна порака посветена на високата стапка на самоубиства кај машкиот пол.
Овогодишната тема на движењето „Мовембер“ е „Stop Men [From] Dying Too Young“ којашто ќе биде акцентирана од различни кампањи и настани посветени токму на многуте мажи што си го одземале животот и што страдаат од психички болести.
Оваа година „Мовембер“ цели кон покревање на свесноста за психичкото здравје и за превенцијата за самоубиства кај мажите – клучни проблеми што се фокус на организацијата уште од нејзиното основање, покрај ракот на простата и на тестиси.
Повеќе од шест мажи и момчиња на возраст од 15 до 44 години секој ден си го одземаат животот во Австралија. Машките обувки беа „послани“ на песокот да го пречекаат изгрејсонцето во името на 191-от маж и момче што си го одземале животот во месец октомври во 2016 година. Осветлени под изгрејсонцето, обувките беа емотивна метафора за светлината што нè чека на крајот на темниот тунел.
„Малкумина се свесни како оваа ситуација влијае на нашето општество. Оттука сакавме да ја потенцираме нејзината сериозност, изнесувајќи ја под светлина со симболична инсталација. Во текот на само еден месец, околу 191 маж и млади адолесценти си го одзеле животот во Австралија. Идејата за инсталацијата беше во чест на секој загубен живот да се постават пар чевли на плажата“ – истакна за „Д Дејли Телеграф“, коосновачот на „Мовембер“, Адам Гарон.
Уште од далечната 1955 година, податоците сведочат дека три од четири самоубиствени случаи во светот се мажи и ситуацијата сè уште е непроменлива. Организацијата „Мовембер“ не само овој месец, туку секојдневно се обидува да ја акцентира сериозноста на проблемот со самоубиствата кај машкиот пол во целиот свет и со тоа да потенцира колку е важно да се побара стручна помош во случај на психички проблем.
Целта на „Мовембер“ е да се организираат едукативни кампањи и настани преку кои мажите што се соочуваат или се соочиле со психички проблеми и обид за самоубиство отворено ќе разговараат и ќе ги споделат со светот сопствените борби. Токму преку секојдневната едукација и разговори на темата за психичкото здравје, организацијата се стреми да го подобри психичкото здравје кај машкиот пол и до 2030 година да ја намали стапката на самоубиства до 25%.
