Ослободете се од очилата и контактните леќи со помош на новата бионичка леќа и подгответе се за совршен вид без разлика на вашата возраст
Многумина од нас се борат со проблеми со видот беза разлика на нашата возраст. Некои се приморани постојано да носат очила или контактни леќи. Но, според Д-р Гарт Веб – Dr. Garth Webb, доктор по оптометрија од Канада кој ја измисли Ocumetics Bionic Lens, луѓето ќе може конечно да ги исфрлат од употреба очилата и контактните леќи благодарение на оваа нова бионичка леќа која што за да се користи би требало да се вгради во човековото око. Ова неверојатно откритие во медицината е резултат на 8 годишно истражување вредно околу 3 милиони долари. Со вградувањето на бионичка леќа се гарантира 3 пати подобар вид не земајќи ја во предвид возраста на поединецот.
Процедурата за вградување на бионичката леќа во окото е безболна и не трае повеќе од десет минути, а резултатите се видливи веднаш. За оваа процедура се вели дека наликува на операција на катаракта (перде на око), а анестезија и престој во болница не се потребни. За разлика од ласерската операција, вградувањето на бионичка леќа е многу побезбедно и не предизвикува понатамошни компликации како проблеми со видот при ноќно возење или при изложување на очите на силна, заслепувачка светлина.
Бионичката леќа би можела да се вгради само во окото на човек кој има над 25 години затоа што структурата на окото не е целосно формирана се до оваа возраст. Процесот на вградување всушност се состои од замена на природните леќи во окото кои се склони кон деградација со новите бионички леќи. Бионичката леќа не предизвикува катаракта или главоболки и не се разградува со текот на времето без разлика колку време ја користите. Станува збор за врвна технологија која е безбедна, долготрајна и максимално ефикасна.
“Доколку едвај гледате колку е саатот на далечина од околу 3.5 метри, после вградувањето на бионичката леќа ќе можете да видите колку е саатот на далечина од 9 метри”, вели Д-р Веб.
Ако оваа технологија се најде на пазарот, тогаш многу од проблемите со видот ќе бидат засекогаш надминати и нема да ни преостане ништо друго освен да ги фрлиме очилата и контактните леќи во канта. Но, клиничките испитувања за бионичката леќа се уште траат, а истата се очекува да биде достапна за употреба за околу две години.
