Луѓето што боледуваат од ова ноќна апнеа често може да не се свесни за својата состојба
Ноќната апнеа е сериозна состојба на нарушување на ритамот на дишењето во текот на спиењето. Луѓето што страдаат од ноќна апнеа се соочуваат со ненадејно и многу често блокирање на дишните патишта и притоа со прекинување на дишењето додека спијат. Ова нарушување во дишењето предизвикува мозокот и останатите органи во организмот да не примаат доволно кислород и оттука да не работат правилно. Во продолжение, прочитајте какви типови на ноќна апнеа постојат, како се манифестираат и како треба да се третираат.
Опструктивна ноќна апнеа
Опструктиваната ноќна апнеа (ОНА) е почест тип на нарушување што се појавува кај човекот. Причината за појава на овој тип апнеа е опструкција на системот за дишење што може да се случи кога мекото ткиво и мускулите во задниот дел на грлото се опуштаат и ги блокираат дишните патишта во текот на спиењето.
Централна ноќна апнеа
За разлика од опструктивната ноќна апнеа, централната ноќна апнеа не се појавува заради опструкција на дишните патишта, туку заради нестабилност во респираторниот центар. Оваа нестабилност оневозможува мозокот да ги испрати потребните сигнали до мускулите што го контролираат дишењето.
Ризични фактори за заболување од ноќна апнеа
Двата типови на ноќна апнеа може да се појават кај жени, мажи и деца и на било која возраст. Ризичните фактори кај кого може да дојде до појава на опструктивна или централна ноќна апнеа:
- Кај лица со прекумерна телесна тежина;
- Кај лица над 40 години;
- Кај лица коишто имаат поголем врат, јазик или крајници;
- Кај лица што имаат помала долновилична коска;
- Кај лица во чие семејство постои историја на заболување од ноќна апнеа;
- Кај лица со назална опструкција (проблеми со синуси и алергии);
- Кај лица со гастроезофагеална рефлуксна болест.
Здравствени проблеми коишто може да се појават во случај на ноќна апнеа
Доколку не се третира навреме ноќната апнеа може да резултира со дополнителни проблеми со здравјето кај оние што страдаат од неа. Луѓето што боледуваат од ова нарушување на дишењето, во спиењето често може да не се свесни за својата состојба. Оттука е многу важно нивните блиски и семејството знаат да ги препознаат симптомите и почетните знаци за појавата на ноќна апнеа за да се спречат дополнителни здравствени проблеми.
Кои се најчестите здравствени проблеми со кои може да се соочат луѓето со ноќна апнеа:
- Висок крвен притисок;
- Срцев удар;
- Дијабетес;
- Депресија;
- Аритмија;
- Главоболки;
- Хиперкинетичко пореметување.
Први знаци за појава на ноќна апнеа:
- Будење со многу суво и надразнето грло;
- Гласно ‘рчење;
- Повремено будење со гушење или губење на воздух;
- Ненаспаност и недостаток на енергија во текот на денот;
- Утрински главоболки;
- Немирно спиење;
- Несоница.
Лекување и третирање на ноќна апнеа
Ноќната апнеа е состојба на нарушување на спиењето што може да се појави заради различни причини. Оттука нејзиното лекување може да вклучи различни третмани и терапии од кои, во зависност од сериозноста, некои може да се практикуваат во домашни услови, додека за некои е потребна медицинска помош.
Терапии и третмани за лекување и третирање на двата типови ноќна апнеа:
- Промена во начинот на исхрана и диети;
- Често менување на положбата на спиење;
- Прекин на консумација на алкохол и апчиња за спиење;
- Избегнување на спиење на грб;
- Носење маска за регулирање на дишењето;
- Хируршки зафат или операција (назална операција, увулопалатопластика и сл.).
