Брашното не треба да ја губи влажноста ниту, пак, да апсорбира дополнителна влажност
Контролата на квалитетот на брашното од видот на земање на мострите, методите за лабораториска анализа на: физичките, хемиските, технолошките и сензорските својства, е регулирана со национални меѓународни законски и подзаконски акти. При земањето на мострите од оригинално спакуваните мелнички производи или во растурена состојба, се прави писмен документ кој се потпишува од страна на лицето коешто ги зема мострите и од претставник на производното претпријатие.
Контролата на квалитетот треба да се врши на: пченицата при приемот на зрното, при елевирањето се анализира секоја мешавина од различни видови, сорти и реони на производство, како и контрола на готовите мелнички производи. На сите пасажни брашна се испитуваат: физичко-хемиските својства, влажноста, содржината на пепел, степенот на омекнување, развој на тестото, квалитетниот број, квалитетна група, отпорот на растегнување, растегливост и енергија. Збирните резултати го отсликуваат саканиот квалитет на добиеното брашно.
Бидејќи брашното е наменето за човечка исхрана, сите машини и опрема кои се користат во производниот процес, се подложуваат на чистење и стерилизација со жешка пареа и ултравиолетови зраци.
Опремата, исто така се третира со антибактериски средства и фунгициди за уништување на микроорганизмите кои можат да предизвикаат негативни дејства врз квалитетот на брашното и здравјето на потрошувачите. После хемискиот третман, се употребува жешка вода за да се измијат остатоците од хемиските материи.
Крајните производи се анализираат со примена на пекарски или со готварски методи за утврдување на квалитетот. Притоа, се анализираат и квалитетните својства на мешавините од различни видови суровини и брашно, квалитетот на пасажното брашно и контролата на предвидениот квалитет на финалните производи. Присуството и количеството на додатоци во крајниот производ се анализира и се запишува на етикетите. Анализите се вршат според барањата и методите пропишани со национални или меѓународни стандарди.
Пакување, чување и дистрибуција на мелничките производи
Мелничките производи се пакуваат во зависност од видот на производот и желбата на потрошувачот. Пакувањето треба да се врши во амбалажа која е на листата на дозволени материјали за пакување, пропишана со законски регулативи.
Пакувањето се врши во услови на целосна контрола и заштита од надворешно загадување.
Брашното се пакува во книжни кеси со големина од 1 кг, 25 и 50 кг. Во зависност од близината и капацитетот на преработувачот, брашното може да се транспортира со вакуумски транспортер или со специјални наменски камион-цистерни.
Сите видови на брашно за леб, за бисквити и интегралното брашно, се чуваaат во соодветни услови од 6 до 12 месеци на температура од 21°C или до две години на температура од 4.4°C. Брашното се чува одвоено од материи кои ослободуваат јаки-силни мириси. Доколку при месењето се употребува оладено или замрзнато брашно, тоа пред употребата се загрева на собна температура и се проверува структурата, мирисот и вкусот.
Брашното без ‘ртулец, не се воспалуваат и можат подолго време да се чуваат. Интегралното брашно потешко се чува заради присуството на ‘ртулецот, бидејќи тој содржи масти. Веднаш после мелењето, мастите се изложени на влијанието на кислородот од воздухот и масните киселини почнуваат да оксидираат и брашното брзо се воспалува. Ова брашно може да се чува максимум до една година.
Складиштата за брашно треба да се обезбедени од пожари и експлозии. Опасноста од експлозии доаѓа кога по која било основа дојде до воспалување на суспензија од фината органска маса -брашното, која се создава при складирањето или преработката.
Со цел да се подобри складирањето и чувањето на брашното, како и за подобрување на пекарските својства, дозволена е употреба на одредени третмани и додатоци, кои мора да се во согласност со пропишани законски регулативи за безбедност на здравјето на потрошувачите.
Зреењето на брашното се одвива во тек на еден до два месеци.
Гризот, ‘ртулците и триците, се пакуваат во соодветна амбалажа која ги исполнува стандардите за дозволена амалажа на прехранбени производи. Како материјали за амбалажа се дозволени хартиени, картонски или полиетиленски материјали. Во зависност од намената, може да се пакуваат во вакуум амбалажа или во растресена состојба. На амбалажата се втиснуваат или се печатат потребните податоци според стандардите или, пак, се налепува етикета на која се отпечатени потребните податоци за производителот и производот.
