Да се биде родител на дете со АДХД е секојдневен предизвик, така што постојат некои стратегии кои би можеле да ви помогнат во одгледувањето на дете кое се соочува со ваков проблем
Доколку вашето дете се соочува со состојба на недостаток на внимание или хиперактивност, тогаш вие како родители мора да се потрудите правилно да постапувате. За да бидете сигурни дека детето ви е среќно, како и со цел да создадете смирена атмосфера во домот, би можеле да ги земете во предвид следните совети кога станува збор за секојдневната интеракција со вашето дете.
Прифатете го фактот дека вашето дете се соочува со АДХД
Кога ќе го направите тоа, вашето дете ќе се чувствува прифатено и ќе знае дека ја има вашата поддршка. Убаво би било кога вие како родител би се фокусирале на добрите страни на АДХД, како на пример зголемената енергија и исклучителната креативност. На овој начин и детето ќе се чувствува посреќно и со поголема самодоверба.
Лековите не се единствено решение
Иако лековите можат значително да го подобрат однесувањето на детето, сепак тоа треба да сфати дека и самото треба да се труди да си ја зголеми самодовербата и самоконтролата. На тој начин детето ќе забележи дека неговото добро однесување не е контролирано и не зависи само од лековите. Задачата на родителот е да му објасни на своето дете дека лековите само би ја подобриле неговата состојба, но без сопствениот труд на детето и поддршка од вас како родители, проблемите не би можеле магично да исчезнат.
Направете разлика меѓу дисциплина и казна
Многумина од родителите знаат да го помешаат значењето на овие два збора, но тие се сосема различни. Убаво би било кога повеќето би се фокусирале на дисциплината затоа што тоа е тоа што ги учи децата како правилно да се однесуваат. Дисциплината ни објаснува како не треба да се однесуваме и ни дава насока за прифатливо однесување. Доколку детето се однесува добро, убаво би било да го охрабриме и пофалиме за тоа. За разлика од дисциплината, казната се фокусира на стравот и срамот за да го присили детето да се однесува на прифатлив начин. Ова би требало да е последен избор на родителот.
Еден добар начин да го дисциплинирате своето дете со АДХД е да одредите реални, достижни цели соодветни за возраста на детето. Секој пат кога детето ќе направи некаков напредок, наградете го.
Вашето дете ќе се чувствува успешно и мотивирано доколку го наградувате неговото добро однесување, а не да го казнувате лошото однесување. И што е уште поважно, не казнувајте го детето за однесување што не може да го контролира. Поради состојбата на АДХД детето може да биде расеано. Ова не значи дека е непослушно, туку е знак дека во некои ситуации не може да го контролира своето однесување. На пример, замислете дека сте му дале некаква задача, но тоа не ја извршува затоа што неговото внимание било одвлечено од друга работа. Во ваков случај, можеби најдобро би било да го потсетите на задачата која сте му ја дале, наместо да го казните за непослушност.
Не кажувајте секогаш НЕ
Нормално е во некој момент да му кажете НЕ на вашето дете со цел да го спречите да направи нешто несоодветно или опасно. Но, понекогаш родителите претеруваат во тоа затоа што се грижат премногу, се плашат да не се случи нешто сериозно, итн., а тоа може да води кон создавање на револт кај детето. Затоа, во некои ситуации можеби е добро да кажете ДА. Ако направите рамнотежа, интеракцијата со вашето дете ќе се подобри и непријатните конфронтации би се намалиле.
Поставете добар пример
Ако вие самите не можете да се контролирате во некои ситуации, тогаш не би било логично да очекувате вашето дете да работи на самоконтролата. Гласното викање е еден пример за несоодветно однесување.
Родителите често мислат дека колку погласно викаат толку поголем ефект имаат врз детето. Но, во такви случаи детето ја забележува само лутината.
Иако е нормално понекогаш да бидете лути на вашето дете, не е во ред да викате постојано. Кога имате дете со АДХД можеби некогаш е подобро да ја „голтнете“ лутината, да вдишете длабоко и да се смирите. На овој начин вие ќе поставите добар пример и детето ќе може да научи дека треба да ги контролира своите емоции.
И не заборавајте да побарате стручна помош доколку ви е потребна. Воспитувањето на дете со АДХД може да ве исцрпи ментално, емоционално и физички, па понекогаш помошта би била добредојдена.
