Водете умерен живот, без прекумерна употреба на жестоки алкохолни и газирани пијалоци, како и храна без конзерванси и надразнителни додатоци за да не станете пациенти прерано!
Денешниот здравствен совет ќе го посветам на машкото здравје и најчестото заболување кај мажи постари од 50 години – Бенигна хиперплазија на простата (БХП).
БХП претставува немалигно (неканцерогено) зголемување на простатата, чија фреквенција се зголемува со возрaстa, а притоа предизвикува симптоми карактеристични за долниот уринарен тракт. Инциденцата на ова заболување расте со возраста, почнувајќи од 8% од мажите во четвртата деценија, до 90% во деветтата деценија од животот. Простата расте со што го притиска мочниот канал што може да предизвика задржување на урината назад во мочниот меур.
Карактеристични симптоми за БХП при кои треба да се јавиме на лекар
- Потреба од почесто уринирање преку ден и во текот на ноќта (ноктурија).
- Потреба од итно мокрење и уринарна инконтиненција.
- Бавен проток на урина, тешкотии во мокрењето, испрекинато мокрење, појава на крв во урина.
- Почести инфекции на уринарниот тракт (поради задршка на урината).
Како да ја превенираме БХП и да ги ублажиме нејзините симптоми?!?
- Најдобра заштита од БПХ се редовни медицински прегледи, кои вклучуваат испитување на простатата. Мажите по 45-годишна возраст, особено доколку во својата фамилијарна анамнеза имааат заболување од овој тип, треба да прават редовни прегледи на простата.
- Промени во стилот на живот може да биде корисни за луѓе со често мокрење. Овие измени вклучуваат:
- избегнување на внес на течности пред спиење или напуштање на станот;
- конзумирање на помали количини на течност кои што ја зголемуваат фреквенцијата на мокрење (на пр. кофеин, газирани пијалоци и алкохол);
- во случај на двојно празнење, човекот треба да го испразни мочниот меур, да почека момент, а потоа да се обиде повторно да уринира;
- да се избегнуваат стресни и нагли движења.
- Сите мажи со БХП треба да избегнуваат лекови кои ги влошуваат симптомите или може да предизвикаат уринарна ретенција. Тука спаѓаат седативни антихистаминици (на пример, дифенхидрамин) и деконгестиви.
Советот до младите е да водат умерен живот, без прекумерна употреба на жестоки алкохолни и газирани пијалоци, како и конзумација на здрава храна без конзерванси и надразнителни додатоци за да не станат пациенти прерано. Многу важно е да се препознаат симптомите карактеристични за БХП и тие навреме да се пријават на лекар. Раната дијагноза значително го подобрува квалитетот на живот и успешноста на терапијата и ја намалува потребата од оперативен третман.
