Проблемите со простатата започнуваат по четириесетата година од животот
Бенигна хиперплазија како немалигно заболување се јавува кај една половина од мажите постари од 60 години, а дури 90% од мажите на 80-годишна возраст имаат аденом на простатата и тешкотии со мокрењето. Простатата почнува да расте по 40-годишна возраст, а најчести пациенти во уролошките ординации со тегоби со мокрење се мажи над 60 години. Постојат неколку различни пристапи при лекување на БХП. Еден од нив е надгледување. Ова се однесува на пациенти кои немаат симптоми на БХП. Не се третираат, но се прават чести прегледи. Медицински третман на БХП се препорачува кај пациентите кои имаат симптоми.
Најчестите симптоми на БХП се јавуваат после 50–тата година, а тоа се:
- Често мокрење, посебно навечер;
- Бавен, испрекинат и слаб млаз на урина;
- Потреба за често мокрење;
- Капење на урината.
Зголемувањето на простатата настанува како резултат на дејството на машкиот полов хормон дихидротестостерон (ДХТ). Тестостеронот се метаболизира во многу потентен андроген дихидротестостерон со помош на два ензима 5 – алфа редуктаза (5AR), поттип 1 (5AR1) и поттип 2(5AR2). За раст и развој на простатата одговорен е примарниот андроген дихидротестостерон
Дијагнозата кај пациентите со БХП се одредува преку неколку испитувања, како што се медицинската историја, физичкиот преглед и лабараториските тестови.
Од лабараториските тестови најчесто се прави анализа на урина, се со цел да се елиминира можноста за присуство на инфекција.
Крвната слика е исто така многу битен фактор преку кој се одредува концентрацијата на (PSA) Простата специфичен антиген и испитување на креатинин. Уродинамското испитување се препорачува исто така кај некои од мажите кои имаат симптоми на БХП.
Третманот на БХП може да биде различен:
Внимателно следење на пациентите кај кои симптомите се благи и не им предизвикуваат посебни тешкотии и најчесто не се третираат со терапија, сѐ додека не се влошат симптомите.
Медицински третман кај пациентите со БХП кај коишто симптомите се значително изразени. Како медикаменти најчесто употребувани се алфа блокаторите и 5 алфа редуктаза инхибиторите (5АРИ).
Алфа блокатори – ја релаксираат мазната мускулатура на простатата и врвот на мочниот меур и помага во ослободување на урината предизвикана од опструкцијата на БХП. Најчести користени алфа блокатори во БХП се тамсулозин, алфусозин, терасозин и др. Овие лекови генерално доведуваат до подобрување на симптомите во рок од неколку недели.
5-алфа редуктаза инхибитори – ја блокираат конверзијата на машкиот хормон тестостерон во неговиот активен облик дехидротестостерон (ДХТ). Проширувањето на простатата кај БХП е директно поврзана со ДХТ, па овие лекови ја намалуваат големината на простатата за 25 % за време од 6 до 12 месеци. Најчесто употребувани 5-алфа редуктаза инхибитори се финастериди дутастерид.
Најдобра заштита против проблемите со простатата се редовни медицински скрининзи на простатата кај мажите по 50 – тата година од животот.
Д-р Венцо Шопов, специјалист уролог
