Дали познавате некој од вашата поблиска околина кој не е презафатен? Презафатеноста како начин на однесување во современото општество
Одамна се немате видено со блиските пријатели и никако не можете да ја прочитате книгата што сте ја купиле пред два месеци? Немате време за одмор, постојано сте под стрес и чувствувате дека времето ве прегазува. Универзалната константа која сите ја разбираме е презафатеноста. Но дали треба така да биде? Дали стилот на живот треба да биде одреден од презафатеноста? Крајно, дали презафатеноста е мит, односно дали сами ја создаваме и дали може да направиме нешто околу тоа со цел да си го подобриме квалитетот на живот.
Ан Бурнет, професорката по комуникологија, истакнува дека зафатеноста е форма на натпревар и статусен симбол, „Ако сте презафатени, тогаш сте успешни“ вели таа. Негативните страни од презафатеноста се бројни: зголемено ниво на стрес, неможност за концентрација, проблеми со спиењето, а бидејќи постојано ве прогонува чувството дека ништо не можете да постигнете, ги скратувате деновите од одмор. Постојат тактики кои можат да ви помогнат да се ослободите од ова чувство, а ние ќе наброиме неколку:
Поставете приоритети
Не може секоја обврска да биде подеднакво важна. Поставете приоритети и посветете им доволно внимание. Исто така, чувството на презафатеност е и начин на размислување. Наместо да ве фаќа паника колку обврски имате, убаво разгледајте го вашиот распоред и одредете кои нешта се најважни и кои обврски е неопходно да ги завршите.
Направете план
Клучно е претходно да направите план за да се осигурите дека нема да заборавите нешто. Планирањето, исто така е добро, бидејќи на тој начин вие сте тие што го контролирате вашиот ден и вашите обврски, контролата е во ваши раце.
Создајте време за одмор
и искористете го за одмор. За да постигнете најдобри резултати, треба да бидете одморени. Ова секогаш ќе биде точно без оглед колку сте презафатени. Веќе преминува во навика, времето предвидено за одмор да го користиме за да завршиме уште некоја обврска, да се провери електронска пошта, да се проследат новости дури се јаде и слично. Правењето повеќе работи одеднаш или мултитаскинг, стана уште една одлика на современиот човек која само привидно го прави попродуктивен, а всушност додатно заморува. На мозокот му е потребно да се смири и да одмори без дополнителни дразби за да може да функционира најдобро што може, па затоа потрудете се времето за одмор да го искористите квалитетно.
Бидејќи презафатеноста е конструкција и начин на размислување кој самите сме го создале, само од вас зависи дали ќе се препуштите да бидете презафатени или ќе направите време за нештата и луѓето што ви се важни.
