horoskop-50-nedela
Споделете со пријателите!

Хороскоп за 50та недела: Пазете се од Овните бидејќи овој период, тие епидемично ќе шират позитивна енергија, заедно со Близнаците кои ќе бидат срцето на забавата. Стрелецот ќе се пофали со својата вита става токму пред празниците, додека Ракот ќе се покае дека не направил внатрешно есенско чистење. Девицата ќе почувствува голема тежина, а Бикот ќе се соочи со метафизички прашања.

Овен

Ќе ширите насмевки како епидемија на грип. Заразни сте. Не, сериозно, стојте понастрана. Очекувајте често да ви велат да замолчите за оние околу вас да можат да уживаат во звукот на меланхолијата. Бидејќи не е здраво човек да биде весел кога е надвор ладно и тмурно. Тоа е спротивно на природните закони.

 

Бик

Оваа недела ќе ве измачуваат метафизички размисли. Ќе се прашувате како е возможно да имате толку надуен стомак, а воедно постојано да чувствувате празнина токму во тој дел од телото. Благодарејќи и на вашата упорност, кон крајот на неделата ќе успеете да ги замолчите тие гласови со пијалок што се добива по пат на дестилација.

 

Близнаци

Вие сте природно гласни бидејќи поседувате еден вграден микрофон што ве прави главни на секоја забава. Всушност, вие сте забавата. Неделава ќе бидете во одлична физичка форма, бидејќи овој период е ваше време. Ќе се соочите со повремени мали технички проблеми како големо ехо и фонија кои што ќе бидат производ на внатрешната празнина.

 

Рак

Брзите промени на расположение ви создаваат вртоглавици. Менувањето мислење побрзо од температурата на еден нетипичен есенски ден, ќе ви создаде чувство на изнемоштеност. Бевте мрзеливи па не направивте есенско чистење, односно отстранување на личности од вашиот живот, па затоа периодов малку ќе ве боли срцето, бидејќи е пренатрупано. 

 

Лав

Кога би можело физички да се опише вашето его, тоа би било едно топло ќебе кое што со својата големина може да го стопли целиот свет. Оваа недела ќе имате проблеми со видот, бидејќи нема да можете да гледате подалеку од носот.

 

Девица

На почетокот на неделата, ќе чувствувате тежината што ќе ве притиска и од која ќе ви биде неудобно во своја кожа. Знаете дека таа тежина не е од вашите килограми, туку доаѓа од нешто подлабоко, но не знаете точно од каде. Дозволете да ви помогнеме и да ви кажеме дека таа доаѓа од внатрешните органи, најверојатно мочниот меур и цревата. Нивното празнење ќе ви даде чувство на олеснување.

 

Вага

Вашата брутална искреност и склоноста кон расправии, ќе ви подари дополнително слободно време кое што ќе го поминете на најдобар можен начин, сами пред огледало. Ќе бидете толку задоволни од тоа што го гледате, така што за момент ќе заборавите на сите неправилно закосени ѕидови во вашиот дом.

 

Шкорпија

Вие не јадете обична чорба, вие јадете потаж, вие не пиете домашно вино туку дегустирате Каберне Совињон со полно тело и овошна завршница. Душевна храна ќе ви биде мислата дека сте подобри од другите. И навистина сте. Во вашиот мал свет.

 

Стрелец

Конечно почнавте да слабеете, и тоа токму пред празниците. Е сега, најистенчен дел од вашето тело се живците, но тоа не ви е важно. Избегнување на некои личности периодов, може да биде особено поволно за вашето здравје.

 

Јарец

Упорно не се откажувате од вашиот рудиментиран хумор, бидејќи сметате дека тој е одлика на вашата традиционалност. Освен тоа, сте чуле дека хуморот е знак на психички здрава личност. Секогаш верни и патетично посветени на вашите навики, кои што само ви вршат лоша услуга и ве прават нивни слуга.

 

Водолија

Ѕвездите ви откриваат дека неделава ќе ги правите среќни сите околу вас. Тоа што се сфаќате себеси премногу сериозно, ќе ги тера да паѓаат од смеење. Продолжете така, бидејќи вие сте вистински пријател кој носи среќа и радост каде и да се појави. Вистинска личност за празничното расположение.

 

Риби

Ова ќе биде возбудлива недела. Но не за вас. И тоа е во ред, бидејќи вие и така повеќе сакате да набљудувате отколку да учествувате. Светла точка и внатрешна радост ќе ви биде моментот кога во маркет ќе се отвори нова каса токму кога вие ќе бидете на ред. Ќе се чувствувате посебно.


Споделете со пријателите!