Доколку не сте од оние кои после десет направени вежби за стомак бараат резултати во огледалото и навистина не ви е јасно зошто не слабеете иако вложувате труд, тогаш оваа статија е за вас
Вежбањето и диетата не даваат резултати, а правите сè што треба? Можеби станува збор за она што не го правите или пак го правите погрешно. Еве неколку причини кои ви стојат на патот до вашата идеална фигура, а за кои можеби не сте знаеле дека не ви одат во ваша полза.
Не внимавате на внесот на калории
Доколку сте одлучни во намерата да слабеете, тогаш ќе треба да внимавате на дневниот внес на калории, барем на почетокот. Секако дека најважен е квалитетот на храната што ја внесувате, но едноставната равенка за слабеење се состои во тоа да јадеш помалку од тоа што трошиш.
Консумирате алкохол
Внимавате на храната, не пиете газирани пијалаци, но за викенди сакате да се опуштите со неколку чаши алкохол? Во ваков случај, вашите обиди за слабеење се залудни, бидејќи скоро сите алкохолни пијалаци содржат многу калории. Некои од нив содржат малку калории и се корисни за здравјето доколку се консумираат во препорачаните умерени количини, како виното на пример, додека некои изобилуваат со калории и немаат никаква здравствена придобивка, како на пример џинот. Една чаша светло пиво има помалку од 200 калории, додека темните пива содржат над 200 калории во една чаша. Коктелите имаат многу шеќер, а најкалорични се жестоките пијалаци како вотка, џин и рум.
Прескокнувате оброци
Точно е дека диета значи помалку храна, но не значи дека треба да се јаде еднаш дневно. Ваквото однесување може да ви создаде само здравствени проблеми. Постојат бројни истражувања кои докажуваат дека оние кои што јадат еднаш до двапати дневно, на крајот од денот сепак внесуваат повеќе калории отколку оние кои јадат повеќе оброци дневно.
Вежбањето го доживувате како обврска
Ако не уживате во физичката активност, тогаш променете ја, бидејќи само така ќе ја постигнете целта. Доколку ви претставува мачење и напор да вежбате, тогаш се многу големи шансите дека ќе го прескокнувате и одложувате времето предвидено за вежби и за кратко време ќе се откажете.
Не подигате тегови
Не зборуваме за голема тежина, туку за оптимална и прилагодена според вашите потреби и желби. Подигањето тегови нема да ве направи со многу мускули, што е најчест страв кај жените, туку ќе ве дефинира и зацврсти. Наместо тегови, можете да користите и растеглива лента. Подигањето тегови е одлична физичка активност за целокупното здравје и за подобри коски, и ќе ви помогне да останете фит на долгорочен план.
Не спиете доволно
Иако можеби сте навикнати да спиете четири до пет часа дневно, тие не се доволни за нормално функционирање. Недоволниот сон се одразува врз сè, вклучувајќи ја и телесната тежина. На телото му е потребно доволно одмор од вежбањето и му треба сон за да троши калории и да ја обнови енергијата. Недоволниот сон исто така значи и зголемено ниво на стрес. Кога телото е под стрес, тоа лачи адреналин и кортизол, кој пак влијае врз зголемување на апетитот.
