violetov-den-borba-protiv-epilepsija-makedonija
Споделете со пријателите!

Утре облечете нешто виолетово и поддржете го „Виолетовиот ден“
Утре (сабота), 26 март, е датумот кога се одржува настанот наречен „Виолетов ден“ ширум светот, за подигнување на свеста за епилепсија. Минатата година, луѓе од дванаесет земји на сите континенти, вклучувајќи го и Антарктик, го одбележаа овој ден. Оваа година, на иницијативата се приклучува и Македонија, и тоа по втор пат. Овој настан, за прв пат кај нас, беше одбележан минатата година од страна на Здружението на граѓани за лица со епилепсија и родители на деца со епилепсија во РМ „Епилепсија Македонија“, додека оваа година одбележувањето е заедно со Лигата за борба против епилепсија на Македонија.

Настанот ќе се одржи утре, 26 март во 12 часот на Плоштад Македонија, пред книжарa „Култура“, како и во 17 часот во Скопје Сити Мол. „Дојдете, заеднички да ја обоиме Македонија во виолетово“, повикуваат организаторите.

Што претставува „Виолетов ден“?

„Виолетов ден“ е меѓународен ден, организиран по иницијатива на народот, посветен за подигнување на свеста за епилепсија кога луѓе насекаде низ светот се облекуваат во виолетово и подготвуваат настани за подигнување на свеста за епилепсија. Девојчето Касиди Меган – Cassidy Megan е основачка на „Виолетов ден“ во 2008 година, мотивирана од нејзината борба против епилепсијата. Нејзината цел, е да ја поттикне свеста на луѓето да разговараат за епилепсијата со цел да се срушат заблудите за неа и да се информираат оние кои имаат напади дека не се оставени сами на себе. 

Од 2008 година, Асоцијацијата за Епилепсија на Нова Скотија – The Epilepsy Association of Nova Scotia  ја  подржува и развива идејата на Касиди, која што денес е позната како кампања за подигање на свеста за епилепсија: Виолетов ден – Purple day.

Епилепсијата е хроничен медицински проблем од кој патат околу 65 милиони луѓе во целиот свет. Таа не е заразна, а може да ја добие секој и на секоја возраст. Кај повеќе од половина од луѓето кои имаат епилепсија, нападите може да бидат контролирани со помош на препишаната терапија. Понатаму, некои деца, во процесот на растење може да ја изгубат епилепсијата, а некои возрасни може да ја изгубат или пак кај нив да се ублажи формата на епилепсија која ја имаат.

Прочитајте:  Денес почнува Европската недела на ХИВ тестирање

Нападите може да се провоцираат заради:

  • Ненавремено земање на лекот;
  • Недостаток на сон;
  • Пропуштање на оброци;
  • Стрес, возбуда, емоционална вознемиреност;
  • Менструален циклус/ хормонски промени;
  • Болест или треска;
  • Ниско ниво на антиепилептичните лекови;
  • Комбинација со некои други лекови;
  • Долготрајно седење пред компјутер,телевизор, видео а понекогаш и сончеви зраци;
  • Употреба на дроги.

Низ историјата, познати се повеќе славни личности за кои се верува дека имале епилепсија. Меѓу  нив спаѓаат: Јулиј Цезар, Александар Велики, Агата Кристи, Сократ, Jованка Орлеанка, Хариет Тубман, Наполеон Бонапарта, Винсент ван Гог, Чарлс Дикенс, Ричард Бартон, Алфред Нобел, Tомас Едисон, Чајковски, Достоевски и многу други. 


Споделете со пријателите!