prednosti-od-vozenje-velosiped-vo-zima
Споделете со пријателите!

Возете велосипед во зима и нема да ви се потребни антибиотици
Доколку сте љубители на велосипеди, тогаш овој текст е за вас. Уживавте на велосипед кога беше убаво времето, додека сега тој е заклучен до следната пролет. Целта на овој текст е да ве предомисли за да продолжите да уживате во благодетите на возењето велосипед и во зимски услови. Во светот постојат бројни примери на користење велосипед како транспортно средство дури и на ниски температури. Оваа практика, особено е карактеристична за скандинавските земји, кои како што знаеме, имаат многу студени месеци. Штом можат Скандинавците, можете и вие!

prednosti-od-vozenje-velosiped-vo-zima_1Пред да започнеме да ги набројуваме предностите и корисните совети поврзани со безбедно зимско возење, најпрво треба да се напоменат неколку причини кои што директно зависат од користењето на велосипедот како алтернативно превозно средство. Урбаното живеење подразбира и грижа за градот, односно со секоја наша активност, треба да се трудиме да го направиме побезбеден и помалку загаден, а со тоа и поволен за здравјето на граѓаните. Главните причини поврзани со користење на велосипедот како превозно средство се:

Свест за загадувањето на околината – пред сè, секој поединец треба да работи на развивање на лична свест за причините за загадување. Изборот на транспорт е многу важен фактор за градското загадување.

Недостаток на велосипедски патеки – недостигот од услови за возење на велосипед знае да обесхрабри, но работите полека се стремат кон промена на подобро. Во повеќе градови во Македонија веќе постојат групи на активисти наречени „Критична маса“, кои што еднаш месечно, преку бројни акции, потсетуваат на важноста од возењето велосипед. Последната критична маса беше одржана под мотото: „Здрав транспорт за здрави градови“. Тие постојано и неуморно се залагаат за  промена на урбаните политики, така што изгледите се позитивни и водат кон подобри услови за возење велосипед во градски услови.

Прочитајте:  Хороскопските знаци во лето

Придобивките од возењето на велосипед се навистина бројни: вие вежбате додека возите, избегнувате сообраќајни гужви и не ја загадувате околината. Вашата награда е јак имунитет и поздраво тело. Освен тоа, возењето знае многу да расположи а доброто расположение гарантира успешен ден.

Грижа и одржување

Првиот совет е да се грижите и да го одржувате вашиот велосипед во исправна состојба, бидејќи тоа е клучно за безбедно возење. Откако ќе завршите со возење, внимателно исчистете ги гумите. Никако не ги заборавајте светлата, нив треба постојано да ги носите со себе, бидејќи некогаш тие ќе ви бидат потребни и дење.

Промена на гуми

Заменете ги летните стари гуми. Возачите најчесто преферираат широки гуми за планински велосипедизам, но најдобри се гумите кои што се погодни и за планински и за градски велосипедизам. Исто така, внимавајте тие да не бидат премногу надуени за да можете безбедно да возите во зимски услови.

Не се облекувајте премногу

Ако се облечете премногу нема да можете удобно да возите и набрзо ќе се испотите бидејќи при возењето вие ослободувате енергија. Најдобро е малку да ви е ладно пред да почнете да возите, бидејќи со возењето полека се затоплувате. Избегнувајте памучни материјали. Носете водоотпорен ранец и јакна која што ќе ве штити од ветар. Капа (или кацига) и ракавици се задолжителни.

Пијте течности и внимавајте на храната

Како и при секоја физичка активност, така и при возење велосипед, лесно може да дехидрирате, иако надвор е ладно. Затоа почесто пијте вода. Исто така, внимавајте и на исхраната. Таа треба да здрава и извор на енергија која што ви е потребна при возењето.


Споделете со пријателите!