Најновото истражување покажува дека трендот на „глутен-фри“ исхраната мора да престане
Исхраната без глутен веќе неколку години по ред е една од најпопуларните во светот. Ваквата исхрана всушност е лек за болни од целијачна болест. Таа е хронична автоимуна болест што се карактеризира со неподносливост на организмот на глутен – белковина од пченица, јачмен, ‘рж и овес. Популарноста ја стекнува заради брзото губење на вишокот на килограми, бидејќи безглутенската диета сосем го исфрла лебот од исхраната и промовира поголема консумација на овошје и зеленчук. Од исхраната се исклучува конзервирана храна, пецива, колачи и пијалаци, кои во себе содржат остатоци на зрнести производи, како пивото и квасецот.
Воедно, храната без глутен не секогаш значи дека е здрава храна, бидејќи производите без глутен многу често не се доволно богати со хранливи материи и се полни со шеќери.Но, овој тренд оди дотаму што луѓе коишто немаат целијакија, тврдат дека не смеат да консумираат глутен. Од 2014 година, бројот на луѓе коишто се на безглутенска диета тројно се зголемил, додека стапката на целијакија останала стабилна без поголеми промени. Овој тренд не покажува знаци на забавување.
Новото истражување откри дека рестриктивната глутен диета може да има штетни здравствени ефекти кај луѓето коишто не патат од целијакија. Тоа е така, бидејќи според истражувачите од Општата болница во Масачусец и медицинското училиште на „Харвард“, оние коишто се на ваква диета, не консумираат или сосем го редуцираат внесот на цели зрна, за кои се знае дека имаат бројни придобивки за кардиоваскуларното здравје. Па така, ваквата исхрана кај здрави лица може да го зголеми ризикот од срцеви проблеми.
Затоа, истражувачите истакнуваат дека промовирањето на безглутенска исхрана кај здрави лица, не треба да се охрабрува.
За целите на опсервациската студија, научниците анализирале податоци од 64 714 жени и 45 303 мажи коишто работеле во здравствената индустрија, без историја на коронарни заболувања. Испитаниците започнале да пополнуваат прашалници за храна во 1986 година, коишто ги обновувале секои 4 години. Истражувачите не забележале значајна врска помеѓу консумирање на храна со глутен и ризик од срцеви заболувања, но забележале дека оние чија исхрана била со рестрикција на глутен „значајно го ограничува нивниот внес на цели зрна, што може да биде поврзано со несакани кардиоваскуларни резултати“.
Доколку вашата цел е да ги намалите килограмите а притоа сте здрави, не се изложувајте на безглутенска исхрана. Јадете правилно, хранете се здраво и балансирано и одржувајте здрав животен стил.
„Житарките се едни од најзначајните намирници за човекот, бидејќи ги содржат сите потребни хранливи материи, во идеална природна рамнотежа и соодветна за човечкиот организам. Поради хемискиот состав и ефектите врз организмот и здравјето, житарките се неизбежни во секојдневната исхрана. Житарките се најдобра храна за почеток на денот,“ пишува во својата колумна проф. д-р Гоце Василевски.
