Вирусната инфекција почнува постепено, додека кај бактериската симптомите настануваат нагло и брзо
Кога зборуваме за болка во грлото, мислиме на воспаление на ждрелото (faringitis), воспаление на крајниците (tonzilitis) и воспаление на гркланот и гласните жици (laryngitis). Чести предизвикувачи на болката во грлото се вирусите и таа инфекција можеме сами да ја лекуваме, додека при бактериските инфекции треба да го посетиме нашиот матичен доктор, кој ќе препише соодветен антибиотик. Бактериската инфекција е специфична и треба соодветно да се лекува за да не дојде до компликации.
Симптоми
Симптомите се разликуваат во зависност од причинителот. Симптомите се: болка во грлото, болка која се зголемува при голтање или зборување, потешкотии во голтањето, суво грло, болка и отечени жлезди на вратот, отечени и црвени крајници, зарипнат глас, одбивање на храна. Инфекцијата на грлото може да предизвика и пропратни симптоми, како што се: треска, кашлање, кивање, болка во телото, мачнина.
Разлика помеѓу вирусна и бактериска инфекција на грлото
Вирусната инфекција почнува постепено, додека кај бактериската симптомите настануваат нагло и брзо. Телесната температура е висока кај бактериската инфекција и општите симптоми се поизразени одколку кај вирусната инфекција. Вирусната се карактеризира со изразени респираторни симптоми, кивање, коњуктивитис, зарипнатост, кашлање. Кај бактериските инфекции ждрелото е изразито црвено со гнојни чворови и затоа е потребно лекување со антибиотик.
Терапија
Кога се работи за бактериска инфекција терапијата ја одредува докторот. Се зема брис од грлото и според антибиограм се одредува антибиотикот. Кај вирусните инфекции може и сами да си помогнеме, со совет од докторот. Препораката е да се пие доволна количина на течности, вода или чај, за грлото да остане влажно и да се спречи дехидратација. Грлото може да се испере со солена вода, да се одржува влажен воздухот, да се користат локални антисептици, аналгетици и антипиретици доколку има зголемена температура.
Превенција
Причинителите кои предизвикуваат вирусни и бактериски инфекции на грлото се заразни. Најдобра превенција е добрата хигена. Неколку совети: мијте ги рацете темелно и често, избегнувајте делење на храна, чаша или прибор за јадење. Доколку не сте во можност да ги измиете рацете користете антисептички гелови, избегнувајте контакт со болни особи, избегнувајте пушење и зачадени простории и навлажнувајте го просторот во кои присуствувате.
Д-р Климентина Грунческа, специјалист педијатар
