Кога ви треба дополнителна енергија, а сте излезени и немате време да планирате оброци, не посегнувајте по чипс или кола кола
Чувството на постојан замор не треба да се прифати како состојба својствена за современиот начин на живот. Нутриционистите истакнуваат дека заморот влијае физички и психички и го уништува имуниот систем, правејќи нè подложни на болести, депресија, а може и да влијае на појава на некои нарушувања.
Постојат многу начини на коишто можете да се „наполните“ со енергија. Редовното вежбање значително влијае на енергијата, како и одредени здрави навики во секојдневниот живот почнувајќи од квалитетен сон, здрав појадок, активности на отворено, пиење доволно вода како и пијалаци без шеќер, изборот на храна и начинот на исхрана. Треба да се земе на ум дека здравата храна не секогаш значи и правилна исхрана. Правилната исхрана е концепт на кој треба да му се посвети поголемо внимание.
Со примена на ваквиот концепт, вашето тело секогаш ќе има доволно енергија во текот на денот, без нагли падови. Но не е толку ригорозно колку што звучи. Впрочем, постојат видови и комбинации на храна коишто за брзо време ќе ви ја зголемат енергијата. Исто така, не треба да имате строг план кој треба го следите и да не излегувате од дома. Токму напротив, активниот живот ви овозможува високо ниво на енергија, а храната треба да ви „служи“ вам, а не вие неа. Шолја кафе или парче чоколадо ќе ве „подигнат„ веднаш, но за кратко време ќе доживеете брз пад на енергијата. Затоа, внимавајте на изборот на храна која секојдневно ја консумирате. Исто така, што и да јадете, доколку не пиете вода, сè e залудно. Водата го прави потребниот транспорт на хранливи состојки и кислород во клетките заради кои добиваме енергија.
Енергетски појадок
Здравиот појадок треба да се состои од хранливи влакна, протеини и здрави масти коишто ќе ви дадат чувство на ситост и ќе ве исполнат со енергија. Одличен избор за енергетски појадок е овесот, бидејќи го стабилизира нивото на шеќер во крвта.
Јадете „вистинска“ храна
Јадете призводи со полно зрно, како и сезонски зеленчук и овошје коишто ќе ви дадат енергија и избегнувајте процесирана храна која ќе ви даде чувство на замор и надуеност. Исто така, од одреден вид на храна изберете ја поздравата опција. На пример, оризот е извор на енергија и поволно делува на целиот метаболизам, но интегралниот ориз е поздрав за разлика од белиот ориз кој содржи многу скроб.
Јадете „супер храна“
Со поимот „супер храна“ се означуваат неколку видови на храна, како и пијалакот кефир, кој се смета за еден од најздравите пијалаци. Тој изобилува со пробиотици, витамини и минерали и помага при многу здравствени состојби (астма, егзема, холестерол, алергии…). Чиа семето исто така спаѓа во оваа група, а дури и неговото име значи „сила“, со што го опишува неговото главно дејство во организмот, а тоа е зголемување на енергија. Гоџи бобинките исто така се сметаат за „супер храна“ заради големата хранлива вредност што ја поседуваат, а во прв ред, заради големото присуство на антиоксиданси. Тука спаѓа и лененото семе, а тоа претставува идеална комбинација заедно со семки од тиква, интегрален сусам и семки од сончоглед. Овој микс е идеален како додаток во вашето смути.
Здрава ужина
Кога ви треба дополнителна енергија, а сте излезени и немате време да планирате оброци, не посегнувајте по чипс или кола кола. Имајте на дофат здрава храна која може веднаш да ја консумирате.
Здрави грицки кои брзо ќе ве заситат и ќе ви дадат енергија се јаткастите плодови, во прв план бадемите и лешниците. Тие се голем извор на енергија, бидејќи се природен извор на магнезиум, помеѓу богатството на минерали и витамини. Магнезиумот е клучен минерал, чија улога му е да активира бројни ензими вклучени во создавање на енергијата на телото. Тој претставува неопходен минерал за целокупното здравје и виталноста на организмот. Исто така, тие изобилуваат со хранливи влакна кои го одржуваат стабилно нивото на шеќер, како и протеини кои што ќе ве заситат.
Идеална комбинација на јатките е сушеното овошје (брусница, ананас, грозје). Ваквата ужина ќе ви овозможи енергија за физичка подготвеност во текот на денот. Овој микс од јатки и сушени овошја, збогатен со овес или житарици по избор, прават одлична комбинација со јогурт. Јогуртот додава пробиотици на овој високо нутритивен оброк кој ќе ви овозможи многу енергија, а се приготвува брзо и лесно.
