Постои една народна поговорка дека не треба да се верува на дебел спортски тренер, ни на болен доктор. Сепак, секогаш најдобро е да се прашаат медицинските професионалци кои се грижат за здравјето и животот на другите луѓе, како тие се грижат за себе
Понекогаш не е доволно само да се придржуваме кон здрава диета, да вежбаме, да спиеме доволно, да избегнуваме стрес и никотин. Понекогаш динамичниот и кај многумина специфичен начин на живот и работа бараат нешто повеќе. Многу од експертите во одредени области, имаат доверба од своите клиенти, односно пациенти и покрај тоа што тие понекогаш немаат доволно слободно време да се посветат самите на себе. Порталот Bicycling направи истражување кај лекарите кои се под најголем стрес и кои најчесто се преморени од работата – кардиолозите, за да испита на кој начин го одржуваат здравјето на своето срце. Исто така, некои од нив можеби даваат контроверзни совети и прават нешта кои што можеби се недоволно прифатени од страна на медицинската наука, сепак тоа е нивно лично мислење и ние се оградуваме од истото.
Повеќе зеленчук и медитација
„Јас се прикрадувам кон зеленчуците со блендирање во смуди. За време на мојата прва година од медицинскиот факултет, сфатив дека никогаш немав време да седнам и да јадам салата. Затоа започнав со блендирање пред да одам на работа секое утро: фрлав неколку пиперки бабурки, моркови, целер, бобинки богати со антиоксиданси и црта чили пиперка (за малку енергија) и го носев пијалакот со мене во болницата.
Луѓето се навикнаа да ме гледаат во кампусот како држам тегла со мојот зеленчуков шејк.
Сега ги додавам сите зеленчуци во блендерот претходната вечер, за во 6:00 часот наутро да додадам вода и лимонов сок, да изблендирам неколку минути и да тргнам. Кога сум под стрес, практикувам позитивна визуелизација, бидејќи најчесто немам време за да вклучам некоја активност за ослободување од стрес, како што е медитацијата, во мојот распоред. На пример, доколку пренесувам болен пациент во количка од собата за прва помош кон лабораторијата за катетари, земам неколку длабоки вдишувања додека ги возам и замислувам како успешно ја реализирам медицинската постапка“ – вели д-р Шила Сани – Sheila Sahni, кардиолог од Медицинскиот центар „Роналд Реган“ од УКЛА – UCLA.
Потсетник за физичка активност и други апликации
„Имам наместено аларм на мојот телефон кој вели „вежбај“ секој ден во 15:00 часот. Блиските ми се смеат, но јас им велам дека тоа е единствениот начин да се осигурам дека ќе имам доволно активност. Откако алармот престанува, го проверувам мојот педометар. Доколку не сум достигнал до 10 илјади чекори, тогаш веднаш штом ќе можам да земам пауза, одам надвор и правам кратка прошетка, трчам надолу и нагоре по скалите на болницата околу 10 минути – за ја постигнам мојата цел. Исто така инсталирав мобилна апликација, која што апсолутно ја сакам, наречена HeadSpace, која што брзо те води низ еден куп на вежби за релаксација и медитација. Се трудам да ја видам додека сум на работа барем еднаш во денот“ – истакнува д-р Керол Вотсон – Karol Watson, директорка на женскиот кардиоваскуларен центар во UCLA.
Јога секој ден
„Се трудам да практикувам јога секој ден и доколку немам доволно време, успевам за 10 минути да направам неколку јога пози како ’Поздрав на сонцето‘ или секвенца на воини. Преферирам Аштанга – Ashtanga) или Виниаса – Vinyasa, затоа што чувствувам дека има повеќе јасни истражувања за нивните придобивки, но сите типови на јога се одлични за намалување на крвниот притисок, пулсот и шеќерот во крвта“ – изјавува д-р Кавита Чинајан – Kavitha Chinnaiyan, кардиолог во болницата Beaumont во Ројал Оук.
Повеќе музика и контакт со природата
„Практикувам енергетска терапија наречена „заземјување“, каде што ги ставате босите стапала на земја и ја црпите енергијата од Мајката Земја. Кога пешачите на овој начин, апсорбирате електрони низ вашите стапала – тоа е буквално како да го вадите огнометот од воспалението низ целото тело“ – вели д-р Стивен Синатра – Stephen Sinatra, кардиолог од Санкт Петербург, Флорида и автор на книгата „Здравствени откритија од небото и земјата“. „Трошам околу 40% од моето време слушајќи музика, започнувајќи од класична музика, опера, па сè до aрапски песни. Тоа е моќен ослободувач од стрес за мене, а студиите покажуваат дека музиката помага да се намали ризикот од развој на срцеви заболувања“ – вели д-р Вилијам Зоби – William Zoghbi, претседател на одделот за кардиологија во Хјустон Методистичката болница во Тексас.
