Некои ја сакаат, некои не, но зимата и ладното време може навистина да предизвикаат проблеми кога станува збор за здравствената состојба
Зимата е период кој некои со нетрпение го очекуваат поради снегот и радоста што ја носи. Но, ниските температури се исто така присутни во зима. Иако ладното време не треба да н спречи да се забавуваме и да се дружиме за време на зимските месеци, сепак е добро да се посвети внимание на сите можни негативни ефекти кои зимата може да ги има врз нашето здравје.
1. Депресивно расположение
Денот во зима е пократок и мракот доаѓа побрзо. Кај некои луѓе ова може да предизвика депресија. Ваквото депресивно расположение може да се манифестира преку засилена потреба за спиење, зголемен апетит, тромавост, незаинтересираност, повлеченост и чувство на безнадежност. Се смета дека вежбањето и некои други начини може да ви помогнат доколку се наоѓате во ваква ситуација. Но, доколку забележите дека спаѓате во оваа група добро би било да побарате стручна помош.
2. Сушење на очите
Очите исто така може да бидат на удар кога времето е ладно. Зимата и ладниот воздух како и сувата топлина од некои типови на греалки може да ги исушат очите и да предизвикаат чувство на печење и чешање. Ваквата состојба се јавува поради тоа што тие не произведуваат доволно количество на солзи. Капки за очи и некои промени во исхраната може да ви помогнат, но најдобро би било да се обратите на лекар.
3. Мигрена
Мигрената не може дефинитивно да се препише на зимата и ладното време. Но, во некои случаи ненадејните временски промени и големите отскокнувања во надворешната температура и притисокот може да бидат причина за појава на главоболките. Иако стручната помош е најдоброто решение, забележувајќи ги деновите кога главоболките се појавуваат вие самите може да видите дали мигрената има некаква поврзаност со временските услови.
4. Промени во видот на исхрана
Нашето тело „бара“ друг вид на храна во текот на зимските месеци. Мрсната и нездрава храна се среќаваат повеќе на нашата трпеза кога надвор е ладно. Но, кога веќе знаеме дека мрсната и тешка храна не е секогаш добар избор, можеме свесно да се осврнеме кон поздрава исхрана и да си ја зготвиме сами. И, исто така би било супер кога би можеле да ги избегнуваме слатките и колачите, барем по малку.
5. Нарушен план на вежбање
Во текот на зимата знаеме да бидеме помрзливи и да го подзаборавиме вежбањето. Краткиот ден и ладното време можат да ја нарушат нашата идеална тежина и расположението, но само ако ние го дозволиме тоа. Ладното време не треба да е причина да паузираме со вежбањето. Трчањето на ладно време може да биде одлично решение, но ако сепак не сте фан на овој вид на вежба и ако ладното време ви смета тогаш останете активни така што ќе вежбате дома. Постојат многу YouTube видеа со огромен избор на вежби што ќе посакате да ги правите.
6. Сува кожа
Кога времето е ладно кожата е склона кон сушење и пукање и тоа знае да биде доста болно. Хидратантните креми може да ви помогнат, па затоа имајте една со вас што ќе ви се најде во секое време. Долгото туширање може дополнително да ја исуши кожата, па затоа скратете го времето поминато под туш. За некои луѓе овој е можеби најголемиот проблем со кој би се соочиле во текот на зимските месеци. Затоа, прочитајте повеќе на оваа тема наредната недела.
