Ротквицата е помеѓу зеленчуците што содржат многубројни витамини и минерали што се од големо значење за одржувањето на доброто здравје на човекот
Ротквицата спаѓа во семејството зеленчуци под името „зелки“, лат. Brassicaceae, заедно со брокулата, марулата, зелката и карфиолот. Овој повеќегодишен зеленчук се одликува со специфичен луткаст вкус што е одличен за подготовка на свежи салати и прилози во јадењето. Ротквицата може да биде со бела, црвена, виолетова и црна боја и со цилиндрична, долгнавеста или кругла форма. Таа е богата со многу витамини и минерали што играат голема улога во одржувањето на доброто здравје кај човекот.
Витамини и минерали што ги содржи ротквицата
Ротквицата содржи голем број на витамини и минерали од кои најбројни се витамините Ц, Б9, Б6, К и Б2 и минералите калиум, манган, бакар, калциум и железо. Кои се здравствените придобивки од овие витамини и минерали и зошто му се потребни на човековиот организам?
Витамин Ц
Витаминот Ц спаѓа во групата на витамини растворливи во вода. Овој витамин се смета за најефикасниот антиоксиданс помеѓу витамините во оваа група. Витаминот Ц е многу важен за синтезата на колагенот, протеин што е важен за здравјето на коските и кожата, како и за метаболизмот на масните киселини.
Витамин Б9 (Фолна киселина)
Витаминиот Б9 или фолната киселина е витална за создавањето на црвените крвни зрнца. Доколку редовно се зема во текот на раната бременост, овој витамин честопати може да помогне во превенцијата на мозочни и ‘рбетни дефицити кај новороденчиња.
Витамин Б6
Витаминот Б6 е важен за синтезата на адреналинот и допаминот. Овој витамин е неопходен за правилна работа на мозокот и на централниот нервен систем, како и на мускулите. Помага во преобразувањето на триптофанот во ниацин и серотонин, невротрансмитер којшто игра голема улога во спиењето, апетитот и расположението.
Витамин К
Витаминот К е коагулациски витамин што спаѓа во групата на витамини растворливи во масти. Овој витамин помага во зајакнувањето на коските, а исто така и во лекувањето на внатрешни крварења.
Калиум
Калиумот е минерал што е важен за функцијата на нервите и мускулите, како и во одржувањето на рамнотежата на течностите во организмот. Калиумот го намалува високиот крвен притисок, како и ризикот од појава на аритмија.
Манган
Манганот е минерал што игра важна улога во правилното растење и обликување на коските, ‘рскавиците и сврзните ткива. Овој минерал е антиоксидант којшто ги исфрла слободните радикали од човековиот организам и ги неутрализира штетните честици со што помага во спречување на потенцијалните заболувања и инфекции коишто може да ги предизвикаат.
Бакар
Бакарот помага во создавањето на хемоглобинот во крвта и ја спречува појавата на анемијата. Овој минерал е есенцијален за зајакнувањето на крвните садови, коските, нервите и тетивите. Бакарот игра важна улога во синтезата на колагенот и еластинот – хормони што се клучни за здравјето на кожата.
Железо
Железото е минерал што е есенцијален за формирањето на здрав и силен имунолошки систем кај човекот. Овој минерал е основниот составен елемент на хемоглобинот во крвта што е важен за пренесувањето на кислородот низ целото тело и на миоглобинот во мускулите, наречен уште мускулен хемоглобин, што има задача да го чува кислородот во мускулните ткива.
Здравствени придобивки од ротквицата
Помага во лекувањето на жолтица
Зголемената концентрација на билирубин во крвта доведува до појава на жолтица. Ротквицата е помеѓу најефикасните природни лекови токму за жолтицата бидејќи ја прочистува крвта и успева да го намали и регулира нивото на билирубинот во неа. Ротквицата е важна за одржувањето на здравјето на црниот дроб и на желудникот.
Делува како природен диуретик
Ротквицата е природен диуретик што помага во исфрлањето на течностите и токсините од организмот. Редовното јадење ротквица, исто така, може да помогне и во ублажување на тегобите при болно уринирање при појава на уринарни воспаленија и инфекции, како и во прочистувањето на бубрезите и уринарниот систем и нивна заштита од повторни инфекции.
Го намалува ризикот за кардиоваскуларни заболувања
Ротквицата е одличен извор на антоцијан, тип на флавоноид што често се поврзува со намалувањето на ризикот од кардиоваскуларни болести. Антоцијанот е всушност црвен пигмент што ја дава бојата на коренот на ротквицата. Многу досeгашни истражувања докажуваат дека овој пигмент има антиканцерогени и антиинфламаторни дејства, како и дека позитивно влијае на обновувањето на крвта.
Помага во лекувањето на инфекции и воспаленија на дишните патишта
Ротквицата има силен луткаст вкус и остар мирис што и дава улога на природен лек во третирањето на инфекции на дишните патишта, како во прочистување на синусите. Ротквицата има антиинфламаторно дејство и помага во лекувањето на инфекции, надразнетост и воспаление на носот, грлото, дишникот и белите дробови.
