efekti-od-pusenjeto-tutun_2
Споделете со пријателите!

Најголема позитивна придобивка од пушењето цигари е доколку престанете да пушите што е можно поскоро
Најголем дел од пушачите на цигари започнале да пушат во раната адолесценција и тоа или од љубопитност или пак, поради чувството на „зрелост“ кое пушењето цигари им го создава, бидејќи правеле нешто кое сé уште не им било дозволено поради нивната млада возраст. Од тоа што го имам забележано многумина започнуваат и на постари години најчесто кога биле под огромен стрес и поминувале низ тешки психолошки моменти во својот живот, со помисла дека цигарите ќе им ги олеснат маките а други пак, од досада. Познавам и такви случаи кои успеале да се откажат и по долги години интензивно користење на овој легален производ и никогаш не се вратиле на старата навика, благодарение на својата цврста волја и решителност и поради фактот што на своја кожа ги почувствувале ефектите од цигарите.

efekti-od-pusenjeto-tutun_1Многу од почетниците никогаш не престануваат да пушат, а исто така никој пушач не знае да одговори на прашањето зошто пуши цигари и кои се добрите придобивки од таа навика. И покрај тоа што можеби зависниците од тутунот не знаат зошто секојдневно купуваат барем по една кутија од нивните омилени цигари, компаниите што го произведуваат овој отров, кои секоја година трошат билиони за реклами и промоции, го знаат одговорот на тоа прашање.  Имено, главната состојка на цигарите е дрогата што го менува расположението наречена никотин, која создава психолошка и физиолошка зависност, а одговорот на второто прашање: „Кои се придобивките од пушењето тутун?“ исто така е еднозначен и општо познат – тие не постојат. Ова од поодамна веќе не претставува тајна. Речиси целиот свет ја знае вистината. На кутиите од цигарите со огромни букви пишува дека „ПУШЕЊЕТО УБИВА“. Со реални фотографии на амбалажите е прикажано дека пушењето создава ред смртоносни заболувања, но и покрај предупредувањата за смртност, страсните пушачи ги занемаруваат затоа што зависноста од оваа популарна легална дрога е посилна од нив.

Слично како и кај користењето на другите дроги, никотинот ги активира патиштата за наградување во мозокот, кои ги регулираат чувствата на задоволство, односно го зголемува нивото на хормонот на среќа допамин. Според Американскиот центар за превенција и контрола на болести Centers for Disease Control and Prevention секоја година година ширум светот умираат 443 илјади активни и пасивни пушачи, а 8,6 милиони живеат со сериозни болести предизвикани од пушењето.  Чадот од тутунот е многу штетен за здравјето. Цигарите се составени од 600 состојки, а кога горат во нив се активираат повеќе од 7 илјади хемикалии. Многу од тие хемикалии се отровни и предизвикуваат канцер, изјавува Американското белодробно здружение.

Пушењето го зголемува ризикот од макуларна дегенерација, катаракта и ослабен вид. Чувството за мирис и вкус исто така може да ослабне, така што храната може повеќе да не ви биде толку вкусна како порано. Телото произведува хормон на стрес наречен кортикостерон кој ги намалува ефектите од никотинот, па доколку сте под голем стрес потребно ви е повеќе никотин за да го постигнете истиот ефект. Физичките последици од одвикнувањето може да го нарушат когнитивното функционирање и да ве направи да се чувствувате анксиозни, напнати, иритирани и депресивни. Исто така, може да ви се појават главоболки и проблеми со спиењето.

Прочитајте:  Робот кој се грижи за вашето здравје [ВИДЕО]

efekti-od-pusenjeto-tutun_3_orgБелите дробови на пушачите се поизложени на настинки, инфекции и грип, бидејќи штетните состојки ги оштетуваат алвеолите и бронхиолите и тие повеќе не се во состојба правилно да ја извршуваат својата функција. Исто така, кај хроничните пушачи постои поголема можност за добивање на рак на белите дробови и развивање на хронични форми на белодробни заболувања, како ефизем или бронхитис. Одвикнувањето може да предизвика болки во белите дробови при дишењето, поради чистењето од катран и токсини.

Никотинот го оштетува целиот кардиоваскуларен систем, а најмногу ги стеснува крвните садови, со што се намалува протокот на крв низ целиот организам. Поради намалениот проток на крв во мозокот, наречен исхемија мозокот побрзо старее и пушачите често имаат проблеми со концентрацијата. Пушењето го намалува нивото на добриот холестерол и го зголемува крвниот притисок што може да доведе до артеросклероза. Пушењето го зголемува ризикот од појава на згрутчување на крвта, што е најчеста причина за мозочен и срцев удар. Пушачите исто така, се поизложени на коронарната срцева болест и рак на крв – леукемија.

Хемикалиите од цигарите ја менуваат и структурата на кожата. Кожата ја менува бојата, се појавуваат брчки и прерано стареење, а ноктите пожолтуваат. Забите и усната шуплина исто така се изложени на оштетувања и болести. Најчести проблеми се инфекции на непцата гингивитис или парадонтоза. Ваквите и слични заболувања доведуваат до оштетувања на забите, паѓање на забите и непријатен здив. Пушењето предизвикува рак на грлото, гркланот и хранопроводникот, рак на бубрезите и рак на панкреасот. Тоа влијае и врз инсулинот, па постои поголема веројатност да се развие отпорност на инсулин, а со тоа и зголемен ризик од Дијабет тип 2. Пушењето го намалува апетитот, па оттука пушачите не внесуваат доволно од дневно препорачаните нутритиенти, а одвикнувањето најчесто предизвикува гадење.

Пушењето тутун има исто така, негативно влијание врз сексуалноста и репродуктивниот систем. Имено поради намалениот проток на крв, на некои мажи потешко им е да добијат ерекција. Мажите и жените пушачи може да имаат проблем да доживеат оргазам и се поизложени на неплодност. Кај жените пак, порано може да настапи менопауза и се под поголем ризик од рак на грлото на матката, компликации во бременоста како спонтани абортуси, проблеми со плацентата и предвремено породување и раѓање на бебиња со помала тежина. Бебињата на мајките кои пушеле во бременоста имаат здравствени проблеми во текот на целиот живот.

Најголема позитивна придобивка од пушењето цигари е доколку престанете да пушите што е можно поскоро!


Споделете со пријателите!