Промените на климата влијаат на храната што ја консумираме, водата што ја пиеме и воздухот што го вдишуваме
Климатските промени се случуваат секојдневно и светските организации предупредуваат дека се проблем кој без сомнение директно влијае на глобалното здравје. Промената на климата вклучува зголемување на температурите и топење на глечерите, зголемување на нивото на водата во морињата и океаните, како и зголемување на фреквенцијата и интензитетот на врнежите, поплавите и сушите. Овие промени директно го загрозуваат здравјето на човекот со тоа што влијаат на храната што ја консумира, водата што ја пие и воздухот што го вдишува. На глобално ниво, популацијата во земјите во развој, како и онаа што живее покрај вода е најзагрозена, но климатските промени се значителен ризик и за останатата светска популација.
Клучни факти за климатските промени
- Климатските промени влијаат на социјалните и еколошки фактори на здравјето – чист воздух, чиста вода за пиење, доволно количество на храна и безбедно место за живеење.
- Помеѓу 2030 и 2050 година, се очекува климатските промени дополнително да предизвикаат уште 250.000 смртни случаи годишно заради лоша исхрана, маларија, дијареа и прекумерна топлина.
- Пределите со слаба здравствена инфраструктура, особено во земјите во развој, ќе бидат најпогодени бидејќи не се соодветно подготвени да се соочат со климатските промени.
- Намалувањето на емисијата на стакленичките гасови преку решенија за снабдување со обновлива енергија, подобар транспорт и начини на исхрана ќе резултира со подобрување на здравјето на глобално ниво.
Како климатските промени влијаат на здравјето на човекот?
Високи температури
Екстремно високите температури го зголемуваат нивото на озонот и на другите загадувачи во воздухот што ги зголемуваат кардиоваскуларни и респираторни заболувања и предизвикуваат сè повеќе смртни случаи, особено кај децата и постарите лица. За време на топлиот бран што ја зафати Европа во 2003 година, беа регистрирани повеќе од 70.000 смртни случаи.
Со зголемувањето на температурите, истовремено се зголемува и нивото на полен во воздухот што влијае на појавата на алергии и на заболување од астма кај луѓето. Високите температури, исто така го зголемуваат и бројот на случаи на труење со храна што содржи салмонела или др. бактерии што многу брзо се размножуваат на повисоки температури.
Природни катастрофи и променливи дождови
Бројот на природните катастрофи на глобално ниво е за три пати зголемен од 1960 година. Секоја година овие катастрофи резултираат со повеќе од 60.000 смртни случаи, пред сè во земјите во развој. Зголемувањето на нивото на водата во морињата и честите урагани, ги уништуваат домовите на оние коишто живеат покрај вода и ги уништуваат и загадуваат нивните извори за храна и вода со што се зголемува ризикот за заболување и инфекции. Променливоста на интензитетот и фреквенцијата на дождовите и на поплавите, исто така, директно влијаат на снабдувањето на чиста вода за пиење.
Недостатокот на чиста вода ја изложува на ризик хигиената на луѓето и го зголемува ризикот од заболување од дијареа, болест од којашто годишно умираат околу 760.000 деца на возраст под 5 години, особено во земјите во Африка.
Поплавите, пак, создаваат плодна земја за инсектите што носат вируси и бактерии што предизвикуваат разни болести, меѓу кои маларијата од којашто умираат околу 600.000 луѓе секоја година, особено деца на возраст под 5 години во Африка. Во екстремни случаи, недостатокот на вода доведува и до појава на суша и глад. До доцните години на 21. век се предвидува дека промената на климата веројатно ќе ја зголеми и појавата на сушите.
Како да го заштитиме нашето здравје?
Многу светски политики и стратегии, како и индивидуални алтернативи, нудат можни начини и решенија за тоа како да се намали емисијата на стакленичките гасови во воздухот. На пример, намалување на употребата на фосилни горива и користење на обновлива енергија во домаќинствата, почесто користење на јавниот превоз, како и на возењето велосипед или пешачењето како алтернативи за приватните возила.
