Возењето е чиста забава, но доколку ви требаат дополнителни причини зошто е добро да се вози велосипед, прочитајте ги овде
Возењето велосипед е добро за одржување на кондицијата и е корисно превозно средство, па радува глетката кога сè повеќе луѓе кај нас одат со велосипед до своите работни места, нешто што е секојдневна пракса на голем број развиени земји. Возењето велосипед треба да претставува начин на живот, а не само рекреација. Ваквата активност е корисна за целиот организам, како за физичкото, така и за менталното здравје. Едно истражување открива дека испитаниците покажале подобри резултати на тестовите за меморија, резонирање и планирање, после 30 минути возење статичен велосипед, отколку пред тоа. Исто така, после возењето велосипед, истите испитаници ги решиле тестовите за пократко време.
Физичките предности од возењето велосипед се познати: добро е за зацврстување на главните групи на мускули и за зголемување на флексибилноста на зглобовите, не бара голема физичка подготвеност, има интензитет онолку колку што ќе посакате, а воедно е и аеробична вежба и транспорт.
Затоа, во продолжение ќе ги опфатиме начините на кои возењето велосипед влијае врз мозокот.
Ве прави попаметни
Кога возите велосипед, постојано размислувате од каде би оделе, по која патека и на кој начин. Треба да се напомене дека во Македонија ова е особен предизвик, земајќи го предвид малиот број на велосипедски патеки низ градовите, па велосипедистите мораат да бидат снаодливи. Доколку возите по планинска патека, мора да бидете претпазливи постојано и тоа буквално ви го забрзува мозокот. Објаснето од страна на научник би гласело вака: „резултира со зголемена когнитивна контрола и стимулира делови од мозокот задолжени за донесување на одлуки“.
Ви го подигнува расположението
Добрата ментална активност претпоставува повеќе од подобрена мозочна активност, односно, важни се и емоционалните придобивки. Вртењето педали го подобрува расположението, ослободува од вознемиреност, ја зголемува отпорноста од стрес и го намалува лошото расположение и депресивните мисли. „Вежбањето е корисно како психотерапија и како антидепресивно средство во лекување на депресија“, истакнува проф. Блументал од универзитетот „Дјук“ во Северна Каролина. Возењето велосипед го зголемува производството на серотонин и допамин, кои даваат чувство на среќа. Полчасовното вртење педали ослободува и ендорфин, исто така задолжен за подобрување на расположението. Најдоброто од сè, е дека редовното возење велосипед ги регулира хормоните адреналин и кортизол, што значи дека возењето го намалува стресот, односно го држи под контрола. Возење велосипед пола час секој ден на отворено, се препорачува за оние кои што патат од несоница, токму бидејќи го регулира кортизолот, кој го оневозможува длабокиот и квалитетен сон.
Го подобрува сексуалниот живот
Според здравствените експерти, поголемата физичка активност го подобрува васкуларното здравје и го зголемува сексуалниот нагон. Едно истражување од Универзитетот „Харвард“ докажа дека мажи над 50 години кои што возат велосипед најмалку три часа неделно, за 30 проценти го намалуваат ризикот од импотенција. Друга студија од Универзитетот во Тексас, истакнува дека 20 минутното возење велосипед ја зголемува гениталната возбуда кај жените.
Останати здравствени придобивки
Врз основа на повеќе различни истражувања, возењето велосипед ви помага да се заштитите од болести како: мозочен удар, срцев удар, некои видови на рак, депресија, дијабетес, дебелина и артритис.
