Уринарната инконтиненција влијае врз квалитетот на животот како и врз социјалното однесување и затоа е потребно навремено да се открие и соодветно да се лекува
Инконтиненцијата е неспособност за контрола на урината. Тоа е неволно испуштање или неможност за задржување на урината. Инконтиненцијата најчесто се јавува како резултат на ослабени мускули на карличното дно. Според светските податоци добиени од клинички студии за уринарна инконтиненција процентот на жени кои се засегнати со овој проблем е 16,9% , а мажите 16%, што значи дека не е голема разликата во проценти помеѓу двата пола.
Овој проблем кај жените се јавува најчесто како резултат на вродена слабост на сврзното ткиво, прекумерна телесна тежина, менопауза, бременост и раѓање, почести воспаленија на мочниот меур и др.
Кај машката популација уринарната инконтиненција обично се јавува како резултат на БХП (бенигна хиперплазија на простата) и хирушко отстранување на простатата (радикална простатектомија).
Иако кај мажите на возраст од над 50 год во најголем број случаи започнуваат симптомите на БХП, тоа не значи дека истите не патат од дијагнозата уринарна инконтиненција. Разликата во дијагнозите најдобро ја утврдува посетата на доктор уролог, кој што по соодветни испитувања и параметри ја утврдува настанатата состојба.
Дел од пациентите може истовремено да имаат и БХП и уринарна инконтиненција, меѓутоа терапија за уринарна инконтиненција ке примаат само доколку симтомите на БХП не се толку многу изразени за да направат ретенција на урина кој е контраиндицирана кај терапија со антимускарински М3 блокатори.
Третманот на ургентната инконтиненција често напредува од бихевиорални техники (тренинг на бешиката) до антихолонергична фармакотерапија. Вежбите вклучуваат тренинг на карличните мускули, планирани (во одредено време) празнење на бешиката и релаксациони техники. Антихолинергичните агенси кои се користат, понекогаш се пропратени со цела низа нуспојави.
Новиот специфичен M3 мускарински рецептор антагонист – solifenacin носи голема надеж во третманот на УИ.
Уринарната инконтиненција влијае врз карактерот на пациентот, врз квалитетот на животот како и врз социјалното однесување односно повлекување, зголемена потреба од лична хигиена, депресија, намалување на професионалната продуктивност .
Токму поради овие карактеристики кои го намалуваат квалитетот на животот кај пациентите истите треба навремено да се откриваат и соодветно да се третираат.
Д-р Диме Коцев, специјалист уролог
