Погледнете ја листата од најдобрите десет иновации од минатата декада
Секоја година при затворањето на годишниот Самит за медицински иновации, Клиниката од Кливленд ги предвидува најдобрите десет медицински иновации за следната година. Разгледувајќи ја оваа листа од топ 10 медицински иновации од изминатава декада, може да заклучиме дека многу од пронајдоците ја револуционизираа медицината.
1. Искористување на Големите бази на податоци (Big Data) за подобрување на здравствената заштита (2011)
Како што беше предвидено во 2011, Big Data стана голем бизнис благодарение на тоа што американските болници ги прифатија електронските медицински досиеја. Истражувачите користат компјутери за да ги анализираат тие досиеја и да ги откријат шемите на одредени болести, со цел полесно да го откријат лекот и за да ги одредат најдобрите терапии.
2. Новата ера во лекувањето на Хепатитис Ц (2014)
Проценето е дека постојат околу 170 милиони луѓе инфицирани со хепатитис Ц, најчесто неидентификуван вирус што предизвикува бавно и прогресивно оштетување на црниот дроб. Со децении, лекувањето базирано на интерферон, резултирало со ниска стапка на успешност. Но, новите терапии без интерферон, се покажаа како многу поуспешни, што на лекарите им дава надеж дека оваа болест може да биде искоренета.
3. Баријатричка операција за контрола на Дијабетес тип 2 (2013)
Оваа иновација им дава надеж на лицата кои се борат со хроничната болест што погодува милиони. Студиите на долгорочната ефективност на баријатричката операција (намалување на желудникот) за контрола на дијабетесот, открија дека по пет години, над половина од пациентите со дијабетес тип 2 имале целосна или делумна ремисија.
4. Перкутани аортни срцеви залистоци (2008)
Оваа алтернатива за операциите на отворено срце, сега е стандарден начин на лекување за многу од ризичните пациенти. Користејќи катетер, докторот вметнува залисток од мрежеста жица преку артерија во срцето, каде што таа се отвора и го заменува оштетениот залисток. Постојат четири уреди за аортни залистоци коишто ги одобри Агенцијата за храна и лекови – FDA за перкутана поправка или замена. Овој тип на технологија се проширува со некои уреди кои оваа година ќе бараат одобрување од FDA.
5. Нови стратегии за создавање на вакцини против грип (2009)
Новата стратегија на вакцини не само што заштитува против смртоносниот вирус на грипот, таа исто така им помогна на здравствените работници да се соочат со пандемијата. Истражувачите употребиле пробна верзија од птичјиот грип, наречена вирусоидна честичка ( virus-like particle – VLP ). Бидејќи тука не е потребен жив вирус, вакцините базирани на VLP се полесни и побрзи за изработка. Овие вакцини им овозможуваат на јавните власти брзо да реагираат на алармирачката инфекција. Во 2014 година научниците започнале да користат VLP стратегии за развој на вакцина против Ебола, која е веќе готова, и се наоѓа во фаза 3 на клиничко теренско тестирање, се покажа многу ефикасна во Африка и се очекува да биде стандардизирана и лиценцирана ширум светот во 2016 година.
6. Инхибитори (2015)
Во 2014 година докторите од Клиниката Кливленд, го открија потенцијалот на имунолошки инхибитори (антитела), нови алатки во борбата против рак. Оттогаш три инхибитори биле одобрени за употреба за пациентите со меланом, што остварило продажба од над 1,5 милјарда долари во 2014 година и на еден му е доделен приоритет за употреба од страна на пациентите со рак на бели дробови. Постојат повеќе од 80 компании што ги истражуваат 148-те имунолошки инхибитори поврзани со многу видови на рак, а 10 од нив се во последна фаза од клиничките испитувања.
7. PCSK9 инхибитори за редукција на холестерол (2015)
Оваа нова генерација на лекови за намалување на холестеролот, неодамна доби одобрување од FDA. Докторите се спремни да им ги препишат на 17% од нивните пациенти со опасно високи нивоа на LDL, што потенцијално создава пазар од три милијарди долари.
8. Компјутеризирана томографија со двоен извор на енергија – Dual Energy Source Computed Tomography (CT) Imaging (2008)
Оваа технологија вклучува два извори на рендгенски зраци и два детектори за радијација, што овозможуваат побрзо сликање на пациентите и со помалку радијација. Новата брзина им овозможува на докторите да ги снимаат пациентите со високи или нерегуларни отчукувања на срцето, нешто кое порано беше потешко. Лекарите ја применуваат оваа технологија за васкуларно снимање, колонографија и за некои видови на рак.
9. Ретинални протези (2014)
Овој пронајдок денес е успешно имплантиран кај повеќе од 130 пациенти ширум светот и започнато е неговото тестирање за други пациенти кои се слепи, поради голем број на болести, освен ретинитис пигментоза. Позитивните, долгорочни резултати од студијата објавени на почетокот од 2015 година, го потврдуваат подобрувањето на квалитетот на животот и независноста кај овие пациенти.
10. Дијагноза на цврст тумор водена со геном – Genome Guided Solid Tumor Diagnosis (2014)
Со продолжени истражувања, геномските тестови сега се достапни за повеќе видови на рак, вклучувајќи меланом, како и рак на мозок, бели дробови, тироидна жлезда и панкреас. Во тек се бројни клинички обиди, со цел да се испита ефикасноста за интегрирање на геномско управувано тестирање на тумори, со бази на податоци за споредба на опциите за лекување базирани на генетиката, наместо на типот на рак. До 2016 година оваа растечка област за дијагноза на тумори по пат на геномичко тестирање, се очекува да има пазарна вредност од 26 милјарди долари.
