Тетовирање: Ризици и совети за заштита на кожата

Дознајте ги потенцијалните ризици од тетовирањето

Како што се зголемува популарноста на тетовирањето, расте и грижата од потенцијалните ризици од тетоважите. Долготрајните тетоважи се нанесуваат со помош на игли со кои се нанесува боја под површината на кожата. Денеска, освен уметничкото тетовирање на различни делови од телото, сè попопуларно станува и козметичкото тетовирање, односно долготрајно цртање на усните, веѓите или очите. 

Ризици од тетовирање

Иако денеска тетовирањето најчесто се извршува во современи и стерилни услови и во тату-студија со високи стандарди, истото носи потенцијални ризици што, иако ретки, треба да се земат предвид. 

1. Инфекции – Можно е пренесувањето на различни инфекции преку крвта во случај на користење на нестерилизирани игли, меѓу кои тетанус, хепатитис Б и Ц, во поретки случаи и ХИВ.
2. Алергии и алергиски реакции – Можни е појава на алергии и алергиски реакгии на различни типови на боја и пигменти и во случај на долготрајни и на краткотрајни тетоважи.
3. Лузни – Можна е појава на лузни во случај на отстранување на тетоважа или во случај на нанесување на тетоважа во непрофесионални услови.
4. Гранулома – Можна е појава на гранулома, односно црвеникави лезии на кожата коишто се предизвикани од материи што телото ги прифаќа како страни тела.
5. Компликации при магнетна резонанца – Многу ретко, можни се компликации при преглед со магнетна резонанца, при што може да се појави отекување или печење на тетовираното место.

Заштитни мерки

Доколку сакате да ставите уметничка или козметичка тетоважа на некој дел од вашето тело или лице, за да ги избегнете потенцијалните ризици потребно е да ги поставите следните прашања:

Во кое студио да се тетовирам?

Распрашајте се и закажете го вашето тетовирање во студио коешто има добра репутација и во коешто работат професионални и тренирани тату-артисти. Меѓу другото, осигурајте се дека студиото ја поседува соодветната лиценца за тетовирање и работи според сите законски прописи и правила.

Дали тату-артистот носи ракавици?

Кога ќе го барате соодветното студио за тетовирање осигурајте се дека тату-артистите носат посебни заштитни ракавици за секој нов процес на тетовирање и редовно ги мијат рацете.

Дали тату-артистот користи соодветна опрема?

Кога станува збор за алатките за тетовирање за еднократна употреба, осигурајте се дека тату-артистот користи сосема нови, неотпакувани за секое тетовирање. Во оваа опрема спаѓаат иглите, пигментите и сите додатни садови и инструменти за еднократна употреба.

Дали во студиото се врши соодветна стерилизација на опремата?

Освен користењето на нова опрема за тетовирање кога станува збор за алатки кои што се за една употреба, многу е важна стерилизацијата на опремата којашто не се фрла. Во оваа опрема спаѓаат машинките и дел од инструментите на коишто се додаваат иглите за тетовирање.

Совети за заштита на кожата по тетовирањето

Грижата за новата тетоважа и тетовираното место се многу важни по тетовирањето. Следете ги инструкциите од вашиот тату-артист и придржувајте се до следниве неколку совети:

• одржувајте го тетовираното место чисто;
• нанесувајте благ хидрантен крем на тетовираната кожа;
• избегнувајте сонце;
• избегнувајте пливање во базени;
• внимателно избирајте ја облеката.

Напомена: Доколку забележите било каква невообичаена реакција на кожата кај и околу тетоважата или сметате дека тетовираното место не заздравува нормално консултирајте се со вашиот лекар.