Научете како ја негувате кожата со текот на годините
Стареењето на кожата може да се забележи по бројни естетски промени како брчки, пигментација, проширени пори, испукани капилари, опуштена кожа. Гените одредуваат околу четвртина од нашиот начин на стареење, додека остатокот зависи од начинот на живот како: неправилна и нередовна грижа, изложеност на кожата на недоволен сон, неправилна исхрана, хроничен замор, дехидрација на организмот.
Во третата деценија од животот кожата почнува да старее, односно тој процес станува видлив бидејќи попуштаат колагенските и еластинските влакна. Први на удар се тенката кожа околу очите и кожата околу устата. После 30-тата година, се губи еластичноста што доведува до опуштање и промени на капаците и бори околу очите, кои на почеток се плитки. Воедно, се собираат и масните ткива па капаците добиваат изглед на „вреќички“ и даваат чувство на умор. Брчките околу устата настануваат заради намаленото количество на колаген во кожата, но дополнителна причина може да бидат и честите мимики и смеењето, како и некои лоши навики како пушењето.
Зрелата кожа најчесто е тенка и сува, со ослабен тонус и подложна на капилари, флеки и останати кожни проблеми. Таквата кожа ја губи својата виталност и потребна ѝ е посебна нега. Со стареењето се намалува капацитетот на обновување на колагенот. По дваесет и петтата година од животот, телото во просек губи 1,5% колаген на годишно ниво. Едноставно кажано, колагенот е „лепакот“ што држи сè заедно; всушност и коренот на зборот доаѓа од грчкиот збор „kólla“, што буквално значи лепило. Постојат четири главни типови на колаген (од вкупно 16 кои што ги има низ целото тело, давајќи му структура и поддршка), а четвртиот тип е оној кој помага при филтрација и може да се најде во слоевите на кожата.
Како да ги препознаете првите знаци на стареење на кожата
- Визуелни знаци се губење на еластичноста и влажноста;
- Кожата станува посува а со тоа и позатегната и склона кон иритации;
- Губи цврстина и се појавуваат првите дамки на оние делови коишто се најизложени на УВ зрачење;
- Губи колаген. Губењето на колагенот негативно влијае врз изгледот и функцијата на целото тело и доведува до различни дегенеративни промени.
На зрелата кожа ѝ е потребна поинаква нега отколку на младата кожа, а производите треба да нудат голема нега и влажност. Популарните козметички производи означени како „анти-ејџ“ ги надоместуваат активните состојки, но не го решаваат примарниот проблем а кожата ја губи својата природна функција. Токму затоа, се препорачува користење на природни препарати коишто ќе ја обезбедат кожата со сите потребни состојки, а со тоа ќе ѝ овозможат виталност. Состојките што ги содржат природните препарати, најчесто изобилуваат со природни масла, лековити билки и етерични масла овозможувајќи ѝ на кожата можност за природна регенерација, без присуство на агресивните супстанци од „анти-ејџ“ препаратите, коишто делуваат сè додека редовно ги користите.
Во вашата потрага по соодветен природен препарат, поволно е тој препарат да содржи масло од арган.
Органското масло од арган содржи дури 80% на омега 6 масни киселини. Бидејќи поседува извонредна хидратантна и хранлива моќ, „анти-ејџ“ ефект и обновувачко дејство, аргановото масло е идеално за враќање на балансот и еластичноста на кожата. Тоа е богато со антиоксиданси, флавоноиди и токофероли, како и линолеинска киселина. Ова масло е особено делотворно против брчки и дехидрација на кожата, за нега на сува и испукана кожа, а во исто време е погодно и за мрсна кожа, бидејќи го регулира зголеменото лачење на себум и поради големото присуство на антиоксиданси.
Со правилна нега, зрелата кожа може уште долго време да остане убава и млада. Убавата кожа е резултат на добра нега и здрав животен стил. Еве неколку превентивни совети:
- Капете се со топла, но не жешка вода. Не користете агресивни формули на средства за лична хигиена и одлучете се за природни препарати.
- Бидете претпазливи со сонцето. Користете крем со заштитен фактор кога сте надвор и носете заштитна облека. Правете редовни прегледи на кожата и бенките.
- Не пушете. Пушењето придонесува за создавање на брчки.
- Избегнувајте шеќер и рафинирани јаглехидрати. Шеќерот му попречува на способноста на колагенот да се обнови самостојно. Сведете ја на минимум консумацијата на додаден шеќер и рафинирани јаглехидрати.
